Aruba Growth Fund a hiba ex abogado dilanti Conseho di Supervision

ORANJESTAD - E fondo local Aruba Growth Fund (AGF) diaranson a hiba nan ex abogado dilanti di Conseho di Supervision (Raad van Toezich) den un asina yama 'tuchtzaak', osea caso disciplinario. E caso ayera a wordo trata tras di porta cera pa tres huez, pues di e desaroyo mes no por bisa nada. Pero e ta referente e caso cu aña pasa AGF a entama contra e tempo ey Radisson Hotel. Durante e caso aki segun AGF, nan (ainda) abogado e tempo ey a actua incorecto, violando regla di comportacion di abogacia, y como tal crea un situacion di conflicto di interes y segun AGF, perhudica nan. Basa riba esey AGF a opta pa hiba nan awor ex abogado dilanti Conseho di Supervision.

ABOGADO PA DOS COMPANIA

E abogado Ronny Wix tabata forma parti di e grupo di AGF e tempo ey (aña pasa). Pero durante e caso sumario di aña pasa di AGF contra Radisson (relaciona cu e compra di e hotel) - segun AGF-, a bin nota cu diripiente e hotel RIU tambe a bira cumprado potencial di e hotel en cuestion (Radisson), y cu e abogado di AGF (Wix) tambe tabata abogado di RIU. E abogado (cu tabatin tur informacion crucial di AGF) como tal lo por a usa informacion di un cliente, pa un otro cliente pa e mesun negoshi. Algo cu AGF no por a acepta, y como tal a dicidi pa cuminsa e proceso cu a wordo trata ayera. 

PORTA CERA

NoticiaCla.com tabata presente pa e tratamento di e caso ayera. Pero na inicio di e caso riba peticion di e abogado en cuestion, Huez a dicidi - riba peticion di e abogado Wix- pa dicidi di trata e caso e ora ey tras di porta cera. Ora cu huez a puntra AGF kico nan kier a haci, e reaccion tabata cu nan ta laga esey den man di Huez y e Conseho di Supervision pa dicidi. E Conseho a reuni un rato entre nan, y despues a participa cu lo cera porta y como tal prensa no por a relata e caso su contenido. 

REACCION DI PARTIDONAN

E portal aki a pidi reaccion despues di e abogado en cuestion,  esta Ronny Wix, pero el a opta pa no duna comentario. " Lastimamente mi no por duna comentario paso e caso a wordo trata met gesloten deuren dus mi no mag di comenta riba e caso" Wix a bisa NoticiaCla.com. Ora cu e portal aki a puntra e partido cu a cuminsa e caso aki, esta su representante Rene Kan, e tambe a responde mescos. "Mi kier respeta e peticion di sr Wix pa trata e caso aki tras di porta cera, y como tal mi ta prefera pa no duna comentario, pero warda e veredicto cu ta riba dia 7 di december proximo", Kan a reacciona pa NoticiaCla.com.