Evaluacion final CSJF: Casi 2000 bishitante internacional a acudi

ORANJESTAD - Caribbean Sea Jazz Festival ta raporta den nan evaluacion final pa 2016, cu casi 2000 bishitante internacional a bishita e festival. Cu esaki, e festival ta cumpli cu un di e rekisitonan di e.o. ATA cu pa por conta cu patronicio, mester por genera por lo menos e cantidad ey di persona. 

E RELATO

Den e weekend di 23 y 24 di September ultimo e di 10 edicion di Caribbean Sea Jazz Festival Aruba a tuma lugar. E tawata un biaha mas un tremendo y  bunita fiesta pa tur e 5500 hendenan cu a asisti riba e dos anochinan. 

Fundacion Caribbean Sea kier a gradici tur bishitante, artista, sponsor y colaboradornan pa nan sosten durante e 10 añanan di Caribbean Sea Jazz Festival Aruba. Sin e sosten di tur hende, CSJF no lo por sigi crece. E festival a cuminsa chikito, pero poco poco a bira mas y mas grandi pero manteniendo e nivel halto pa cu e organisacion. Pa celebra Caribbean Sea Jazz su di 10 edicion nan a laga traha y publica un buki di portretnan den cual e ultimo 9 añanan di CSJF a ser ilustra, cu diferente artistanan cu a presenta durante e añanan na CSJF. 

E pensamento inicial semper pa cu e festival tawata e unificacion, forza y e inspiracion di musica. Pa jong y bieu, pa tur localnan y tambe pa e turistanan. Y sin lubida pa amantenan di cultura den e sentido mas amplio di e palabra. Unda cu talentonan local, artistanan internacional, arte , cuminda crioyo y principalmente e bishitantenan di Aruba tur ta bini hunto pa disfruta di dos anochi di un gran festival. Mas y mas localnan ta descubri cu ‘Jazz’ ta representa diferente tipodi musica manere Latin, Soul, Blues, Tango, Pop, Funk y Aruba su propio talentonan musical.

Hopi di nos turistanan sa caba di CSJF y ta cumpra nan ticketnan di Early Bird online prome cu e line up ta conoci. Paso mane ta conoci caba, e calidad di musica y e organisacion di e festival ta riba un nivel halto y cu semper ta trece un bon ambiente tur aña. Caribbean Sea Jazz Festival ta wordi considera como e One Happy Festival. Nunca no tin nada di keha, ningun molester, sin ningun incidente y hasta durante e palonan di awacero e publico semper ta sigui balia y goza.

CSJF a realisa un total di 180 concierto cuminsando den aña 2006 te cu e aña aki 2016. E festival ta parti den 3 escenario, bishitantenan por wak 8 diferente concierto pa anochi pa un prijs di entrada hopi atractivo. Y durante e tempo aki nunca un banda internacional  a cancela y semper e programa a cana segun plan. Y pa promove e festival durante e añanan CSJF a organisa mas cu 20 concierto pa e pueblo di Aruba completamente gratis.

Un di e misionnan di e Fundacion Caribbean Sea ta pa medio di musica, laga e hubentud Arubiano wak mas leu y kiko tur ta posibel cu musica. Y un di e maneranan cu e fundacion ta logrando esaki ta cu e diferente workshops cu nan ta organisa cu artistanan internacional cu ta bishita diferente scolnan na Aruba. 

Riba e tereno di e Festival por a sinti e cultura Arubano den tur forma; di e skina di cuminda crioyo, pa e Galeria di Arte impresionante cu productonan local. CSJF ta un producto local y ta pesey ya pa 10 aña caba ta trahando exclusivamente cu empresarionan y productonan local. Luz y Zonido, e scenarionan, revistanan, posternan, banners, t-shirts nan y personal.

E aña aki CSJF a duna bon bini na casi 2000 bishitantenan internacional na e festival, entre nan a  cu a bini tin e artistanan, prensa y bishitantenan di e festival. CSJF ta un festival profesional (un evento premium) cu ta wordo organiza y unda un cantidad determina di turistanan ta bini p’e y cu ta genera cobertura internacional pa e Festival y pa Aruba. 

Caribbean Sea Jazz Festival ta gradici un biaha mas tur Sponsor, colaborador y media di Aruba pa nan contribucion. Nos lo bai sigui crece y lo tey pa sigur 10 aña mas danki na e apoyo di e pueblo di Aruba. Nos ta spera boso bek September 22 y 23, 2017.