InselAir ta reconoce su problemanan y ta ofrece su disculpa

WILLEMSTAD/ORANJESTAD - Ta posibel cu pasahero cu a hasi uzo di servicio di InselAir ultimo tempo, a haña nan confronta cu retraso y por ta den cierto caso cu cancelacion di buelo. InselAir den un comunicado diaranson, a splica cu e compania ta reconoce su problemanan y ta ofrece su disculpa na tur esnan cu di cualkier forma por a sufri di e inconveniencia aki. "Nos ta consiente di e frustracion y tambe e incomodidad como resultado".

DUNA INFORMACION

Un di e kehonan mas frecuente ta e falta di informacion adecua y tambe e echo cu lo no tabata atende keho di pasaheronan perhudica cu suficiente atencion. "Gerencia kier enfatisa cu InselAir cu tur siguransa ta ambiciona un servicio mas adecua cu locual na e momentonan aki nos ta ofrece nos clientenan. Sinembargo, e reclamo frecuente cu InselAir no tin suficiente atencion pa conveniencia di su clientenan, ta algo cu ta yega na nos curason. Nos kier splica bo kico e situacion ta".

COMBATIENTE MENOR

Riba tereno di aviacion mundial, InselAir no ta mas cu un combatiente menor. Apesar di e retraso den pago for di Venezuela ainda nos ta logrando mantene nos mes riba pia. Ta algo cu nos ta orguyoso di dje. Nos ta hopi gradici na nos suministradornan, na gobierno di Curacao y na nos colaboradornan cu cada dia di nobo ta uni forsa cu nos pa enfrenta e reto pa sali for di e situacion problematico aki.

RESPET PA NOS COLABORADORNAN

Gerencia ta hopi consiente di e esfuerso enorme cu tur dia tur colaborador di InselAir tin cu haci bou di e circumstancianan dificil actual. "Nos tin gran aprecio pa nan entrega y nan confiansa. Den e situacion no hopi reconfortante, pero temporal aki nan ta haci nos maximo esfuerso. Pa medio di esaki, di curason nos ta pidi nos clientenan compresion y pasenshi" e compania ta sigui bisa.

E presion financiero cu tin riba nos organisacion

E realidad ta cu InselAir na e momentonan aki ta confrontando un situacion di cashflow sumamente desafiante cu ta consecuencia di e debe di mas cu 100 miyon dollar cu Venezuela tin serca nos. Pa mas cu seis aña largo Venezuela tabata un mercado crucial pa InselAir. Un mercado cu, pa motibo di e debe asina grandi, nos mester a bandona parcialmente. Pa nos por mantene nos compania existente y den futuro tambe, nos a baha nos quota di mercado di 34 pa menos cu 4 porciento y tambe busca pa compensa esey cu rutanan alternativo den nos region. Esey nos a haci pa mantene, e organisacion y infrastructura di InselAir na mes nivel y sigura trabou di 750 empleado. Sinembargo, e tardansa di pago di Venezuela ta sigui ta un presion considerabel riba nos organisacion y ta pone cu nos ta enfrentando un reto financiero grandi.

SEGURIDAD NA PROME LUGAR

Segun e compania, den nan maneho, seguridad ta prioridad. Mester evita tur situacion di inseguridad. Cualkier tardansa cu esey por causa ta resultado di e maneho di seguridad, y no tin nada di haber cu algo otro.

ESFUERSO PA COMUNICA MIHOR

Reconociendo, cu enberdad falta di informacion adecua, bou di ningun circunstancia ta depende di situacion financiero. "Nos ta consiente cu mester drecha esaki. Mientras tanto, tras di cortina nos ta haci tur esfuerso pa guia InselAir den bientonan menos bruto, suministracion di informacion corecto y rapido tin nos atencion absoluto y imediato. Ta basta tempo caba cu nos ta hibando combersacion cu partner strategico pa logra inversion importante y alabes hunto cu nan yega na un flota mas hoben creando un futuro solido pa InselAir. Ademas lo tin un reorientacion di InselAir su schema di buelo pronto".

Den e dianan nos dilanti InselAir lo tin cu enfrenta retonan grandi y nan ta spera di por sigui conta cu e sosten den esey. " Nos ta haci tur locual ta posibel pa riba termino cortico pone nos servicio atrobe riba e nivel cu mercado ta exigi y a conoce". Manera anuncia anteriormente na luna di september, esaki lo ta parcialmente posibel door di e grupo di pilotonan nobo cu a keda adkiri recientemente y tambe e regreso di algun avion den servicio despues di mantencion necesario. "Mientras tanto nos lo trata mas cu nos por pa nos pasaheronan no mester sinti ningun, of casi nada di molester di esey" e compania a sigui bisa.

DISCULPA FINAL

"Un biaha mas, nos disculpa pa e inconveniencia. Pa locual ta futuro nos por bisa: "Nos ta continua cu nos esfuerso pa reach higher'" e comunicado ta finalisa bisando.