Listramento preventivo a produci varios detencion y captura di droga

ORANJESTAD - Den fin di siman Cuerpo Policial a organisa un accion di listramento preventivo (preventief fouilleren) segun ley ta prescribi hunto cu Ministerio Publico, for di 6or di atardi dia 21 di october te cu 6or di mainta diasabra.

Durante di e accion, polisnan a logra intercepta varios persona activo pa cu benta di droga, algun persona coriendo auto bou di influencia di bebida alcoholico y dos persona cu no tabatin prueba cu nan estadia na Aruba ta uno legal. E unidad motorisa tambe a participa na e accion aki.

Cuerpo Policial a traha 115 procesverbaal, a detene 7 persona en conexion cu e ley di droga ilegal, y a detene dos persona den cuadro di e ley di LTUV (estadia ilegal). A para 6 persona relaciona na e ley di stuur bou di influencia di alcohol: 4 persona a wordo getest y dos a wordo hiba cas pa nan mesun famia. Ademas a controla 474 persona relaciona cu buracheria den publico; 17 persona a coopera cu test di alcohol riba caya, y 12 auto a wordo getakel.

Cuerpo Policial tambe a controla Tipsy, Cas Casuela y Euphoria pa percura cu nan ta mantene na e orario pa cera; y a listra nuebe grupo di persona. E miembronan di Unidad Motorisa (Motor Unit) a controla mas of menos 120 vehiculo durante di e accion. Nan a detene 6 persona pa coremento di auto bou di influencia di alcohol; a skirbi 12 procesverbaal relaciona cu falta di  documentonan manera seguro y belasting "al dia" y a laga takel cuater vehiculo.

Cuerpo Policial pa medio di accionnan di listramento preventivo y e tarea preventivo di Flex Team ta logrando pa intercepta chauffeurnan coriendo bou di influencia di alcohol y substancianan prohibi prome cu nan causa accident; pero tambe ta intercepta bendemento di droganan ilegal, y ta logra kita droga for di caya prome cu e yega na e cumprado.