Proyecto Isla di Oro un biaha mas den discusion

ORANJESTAD - "Nos ta conduciendo e ultimo estudionan medio ambiental (pa e proyecto hotelero na Isla di Oro) " tabata e reaccion di e desaroyado di e proyecto na Isla di Oro, Frans Sydow diaranson na NoticiaCla.com. E ta referi na esaki riba e grito di protesta di Aruba Birdlife Conservation cu a publica un serie di 'drone shots' riba nan pagina di facebook di e situacion na e sitio en cuestion, kehando riba e boramento cu ta tumando lugar na e sitio. E desaroyado ta admiti cu nan ta borando, pero tin un motibo husto. " Esaki ta e unico forma pa midi e impacto riba e medio ambiente" Sydow a bisa e portal aki. 

DESAPROBACION

E grupo di ABC mientrastanto a mustra su desaprobacion y como tal no ta contento "Tristesa den naturalesa, mangrove atrobe" e texto ta cuminsa bisa. "Lamentablemente boramento pa investigacion di otro hotel na Isla di Oro, un di e 16 areanan natural, determina pa Parlamento di Aruba pa wordo protegi" e texto ta sigui bisa. Sydow di su parti ta sigui reacciona, informando NoticiaCla.com cu nan ta conduciendo 2 opinion ambiental manera sugeri pa e gruponan no gubernamental (NGO). Nan ta encera estudio Bentic, rif di coral, encuesta riba pisca, mangrove, muskita. Segun Sydow, prensa ta invita dia 10 di november ora cu nan presenta e resultado final di e estudionan aki. "E resultado di e estudio (EIA), lo prueba cu nos lo proteha, preserva y engrandece e mangrove, entre e otro topiconan ambiental sensitivo", Sydow a finalisa bisando. ABC mientrastanto ta yama esaki un momento historico tristo, y a pidi pa continua cu e peticion di firma cu ta canando y a surpasa 10 mil firma caba. 

PROBLEMA ENTRE GRUPO

No ta e prome biaha cu tin un discusion entre e dos gruponan aki. Tabata apenas algun siman pasa cu e grupo di desaroyado a reacciona riba ABC su alegacion, y a mustra cu nan ta robes. ABC ta para ariba cu nan tin rason y cu nan tin forsa di Parlamento nan tras. Di parti di gobierno, NoticiaCla.com tabatin confirmacion cu minister di turismo Otmar Oduber, ta sostene e proyecto aki. E proyecto mientrastanto mester bira uno unico den su estilo, cu mester a cuminsa caba, pero pa motibo burocratico a keda pega y ta apenas haciendo estudionan aworaki. E intencion tabata pa habri e boutique hotel na e sitio na sea 2017 of 2018. NOTA. Fotonan ta di pagina di facebook di Aruba Birdlife Conservation.