Lo organisa conferencia Linguistico Internacional na Aruba

ORANJESTAD - Minister Michelle Hooyboer-Winklaar a ricibi un parti di e miembronan di directiva di Fundacion Lanta Papiamento y un parti di e comision organisado di e Conferencia Internacional Linguistico cu lo tuma luga na augustus proximo den Holiday Inn Hotel. Drs Joyce Pereira, presidente di FLP a duna un splicacion amplio di e programa, cual lo inicia dia 5 di augustus y lo clausura dia 8 di augustus. FLP, IPA, Biblioteca Nacional, Directie Cultuur ta forma e Comite Organisado Local (LOC). Aruba a conoce un conferencia di Caribbean Society for Linguistics na 1980, tempo cu Ramon Todd Dandaretabata vice presidente y despues presidente di e prestigioso sociedad academico linguistico aki. E importancia di e SCL ta cu ta dedica su mes na estudio di idioma den Caribe y ta percura pa publicacion di e resultadonan di e investigacionnan.

E aña aki e conferencia lo consisti di e partner  Society for Pigeon and Creole Languages y Associaao de Crioulos de Base Lexical Portuguesa e Espanhola (ACBLPE) tambe. Lo tin oradornan di entre otro Aruba, Jamaica, Corsou y Cabo Verde! Tur educador, studiante, escritor y publico en general ta wordo encurasha pa participa na e conferencia aki. Lo tin charlanan sumamente interesante, tayer, presentacion di poster y presentacion plenario pa un y tur interesa.

Minister Michelle Hooyboer a keda hopi impresiona pa e trabou intensivo  realisa pa e Comision Organisado Local bou presidencia di Drs. Joyce Pereira. Minister ta contento cu e "Sala di Papiamento" cual lo ta un centro na e conferencia caminda cu lo expone material y buki, DVD y mas pa un y tur por cera conoci cu tur locual cu Aruba ta haciendo riba e tereno di nos idioma Papiamento. Personanan interesa den mas informacion tocante e conferencia aki y pa registracion por tuma contacto cu Joyce Pereira, presidente di Fundacion Lanta Papiamento na number di telefon 567-4699 of cu Ronny Alders na Biblioteca Nacional, na number di telefon 5821580. Informacion tocante SCL ta obtenibel via di e website: www.scl-online.ned/conferences/2014.