Ruta di atraccion na San Nicolas pa por atrae turistanan

SAN NICOLAS - Gobierno lo crea ruta di atraccion na San Nicolas pa por atrae turistanan. Ayera Ministerio di Turismo/Cultura conhuntamente Departamento di Transporte Publico y Aruba Tourism Authority a duna presentacion na grupo di  representantenan di asociacion di taxi, companianan di tour y autobusnan cu tin permisonan specialmente dedica y enfoca riba San Nicolas como nan destinacion final. 

PRESENTACION

Ministerio di Cultura a duna presentacion relaciona cu e diferente desaroyonan cultural, pero tambe diferente puntonan di interes cu tin na San Nicolas cu ta hopi abundante. A presenta un lista amplia cu varios puntonan y asina mes a keda cu diferente punto cu por a elabora riba dje. A trata diferente tema manera sitionan di interes, sitionan cultural y tambe sitionan unda cu lo por come of bebe y bay beach.

STAND CULTURAL

Aworaki ATA lo bay crea 3 standard tour cultural, uno cortico di 3 ora y dos largo di  5 - 6 ora pa asina ofrece e diferente hendenan den e sector di transporte pa asina nan por ofrece diferente tour cultural pa San Nicolas. Tambe a papia di e posibilidad pa ofrece training esencial pa esunnan cu ta den contacto cu turista y cu ta den e sector di transporte pa asina nan tin informacion uniforma y corecto ora ta trata di Aruba y nos Herencia. Lo keda informa  tur hende di e desaroyonan aki, sr. Zaandam a termina bisando.