Eman: Pakico no a bringa Hulanda mas riba nombracion Gobernador

ORANJESTAD - "Cu dolor (nos) a leg erbij neer" prome minister Mike Eman a bisa dialuna den Parlamento splicando pakico a scoge e rumbo cu a tuma siman pasa diamars. Segun e prome mandatario, gobierno di Aruba a scoge pa trankilidad y pa sigui dilanti y duna e Gobernador nombra, e funcion formal y 'gezag' cu e mester tin. Esaki enbes di coy e caminda largo pa bringa e proceso y Hulanda, dañando e relacion den Reino aun mas cu e tabata recientemente ora cu a rechasa e nombracion prome. Asina Eman a splica pakico a opta pa 'leg erbij neer' esta 'no acepta pero haci'e toch pa buena marcha', versus  'aanvaarden' cu ta nifica cu ta acepta sin mas, implicando asina cu bo ta acepta cu bo ta fout. Algo cu Aruba ta para ariba cu no ta e caso. 

SACRIFICIO GRANDI

Cu su hecho, Eman a splica Parlamento cu 'Aruba a haci un sacrificio grandi', cu e unico meta pa sigura den futuro cu e acuerdo pa nombra Gobernador, sigui vigente. Algo cu por zona contradictorio segun analistanan, mirando cu mientras cu no a cambia nada na e acuerdo, y cu Hulanda awor a actua asina, no tin garantia cu esaki lo bolbe sosode den futuro. Hopi pregunta cu tabatin, a wordo contesta, pero ta keda na cada ken pa acepta e respuestanan y of cuestiona esaki.

CONTESTACION DI PREGUNTA

Eman a cuminsa na pone e tono pa resto di e mainta, indicando cu no ta algo nobo cu su gobierno a haci pa bringa e situacion, sino cu ta algo cu for di 1970 a sosode caba ora cu Antiyas a protesta nombracion unilateral di Efrain Jonkheer como Gobernador di Antias. A relata te hasta e situacion di e tempo di 1991 ora cu Hulanda no kier a acepta Poy Werleman como candidato (pasobra e tabata dispuesto solamente pa sirbi 3 aña den funcion y Hulanda tabata kier un termino completo). Segun Eman, e tempo ey prome minister Nel Oduber tambe a 'sapatia' y a logra e biaha ey pa bin cu otro candidato for di Aruba mes su escogencia (Olindo Koolman) y no laga Hulanda scoge e candidato p'e. Algo cu sinembargo awor Eman no a logra. 

Pregunta cu si e proceso pa nombra Gobernador, manera determina na 2001 ainda ta vigente, Eman a contesta cu si, y cu e no ta mira ningun otro informacion of documentacion pa sigura cu esaki a cambia. Pues pa Eman, no tin otro proceso. Mas laat, parlamentario Marisol Lopez Tromp no a duna gusto na e contesta ey completo, y a pidi Eman pa 'evita tur malcomprendemento', pidi Hulanda of conseho di minister di Reino, si nan por confirma esaki tambe. Algo cu Eman a nenga, pasobra e no ta sinti cu ta na Aruba pa haci un pregunta asina, sino mas pa mustra Hulanda cu e acuerdo ainda ta vigente. 

Segun Eman, contestando otro pregunta, ningun momento Hulanda a bisa kico ta robes cu e candidato principal di Aruba, Angel Bermudez, pero cu solamente cu e candidato di Hulanda, tabata miho. Como tal, contestando otro pregunta, Aruba no a haya necesario pa busca otro candidato, tanten cu Conseho di minister di Reino no por bisa kico ta robes cu e candidato. Pa rechasa un candidato, Conseho di minister di Reino mester bin cu argumentonan hopi severo, pa e por tin un impacto. Asina mes, e por 'toets' e proceso, pero den un forma minimal. "Nan no por bay mas leu cu e toets marginal" Eman a sigui bisa. 

A ACTUA ETICO OF NO

Eman a bay mas leu y culpa gobierno Hulandes di no a actua 'etico' den e proceso. Segun Eman, Hulanda no a actua eticamente door di ofrece un persona den funcion di minister di un otro gobierno, e funcion di gobernador pa actua pa e gobierno Hulandes (como representacion di Reino). "Hulanda no tabatin e autoridad pa bin cu un candidato. 

SCREENING Y DRAAGVLAK

Den su contestanan dialuna na Tweede Kamer, minister Ronald Plasterk a mustra cu a tuma e desicion pa nombra un persona, pasobra no tabata mira cu Aruba por a presenta esaki y cu e por a conta cu un draagvlak amplio. Aki Eman a reacciona den Parlamento dialuna, mustrando cu con por ta posibel cu ta papia di draagvlak amplio si e persona cu Hulanda a nombra, no ta esun di gobierno di Aruba, y como tal e no tin draagvlak na Aruba. Pa loke ta screening, contestando otro pregunta, Eman a mustra cu e candidato di Hulanda (Boekhoudt) no a wordo gescreened pa gobierno di Aruba, pero ta asumi cu mirando cu ta Hulanda a propone e candidato, cu Hulanda si lo a screen e candidato y cu elo a pasa esaki pa Hulanda. 

PREGUNTANAN FINAL

Na final, varios miembro di Parlamento tambe a haci pregunta. Entre nan, kico minister Benny Sevinger a bay haci Hulanda, riba cual Eman a contesta cu Sevinger tin un historia di ta envolvi den asuntonan di Reino, pues e ta bon informa riba e tema aki. Preguntanan di un parlamentario, cu pakico Boekhoudt no ta bon, si e ta aproba e lastramento contra Boekhoudt, y si ta bay pidi un despensa publico, no a haya un contesta directo sino mas superficial. Entre nan, cu e discusion cu por sigui, versus e lastramento, ta e proceso di nombracion pa mustra cu esaki por ta algo sano, esta e forma con ta haci esaki, y e por sirbi pa tene esaki na bida. Pero no a bay riba e parti si ta para e 'lastramento' contra e candidato.