Aruba y Hulanda ta keda dividi riba asunto di Gobernador

ORANJESTAD - E asunto di nombracion di Gobernador (den e caso aki pa Aruba) ta sigui dividi e dos paisnan den Reino, Aruba y Hulanda. Riba e mesun dia cu prome minister Mike Eman den Parlamento a purba defende su accion recien na Hulanda referente e tema sigurando cu Aruba a haci e cos corecto y cu Hulanda tabata robes, colega minister Plasterk na Hulanda tabata informa Tweede Kamer di exactamente mescos, pero pa Hulanda. Esta cu Hulanda a actua corecto segun Statuut den e proceso di nombracion di un gobernador. Tur esaki mientras cu ambos mandatario a bai di acuerdo riba e tema un siman pasa awe, den un declaracion mutuo y cu ta 'cera e tema'. Un siman despues, ambos ta sali afo atrobe y haci declaracionnan cu ta sigui dividi e paisnan aki. 

KEN A ACTUA INCORECTO

Prome minister Eman repetidamente a bisa den Parlamento cu Hulanda a actua incorecto, a actua totalmente empugna cu e areglo cu tin, no teniendo nan mes na e areglo ey di 2001 unda cu ambos pais a cumbini un protocol con pa nombra un Gobernador pa e respectivo islanan. Mientrastanto riba e mesun dia Plasterk den un carta pa Tweede Kamer a sigura e miembronan ey cu Hulanda no a haci nada malo, y cu Hulanda a actua conforme Statuut, y cu ta Aruba a actua robes, den sentido cu nan a tarda den e proceso aki. Esey a pone cu Hulanda a dicidi pa actua. Eman mes momento na Aruba, contestando un di e preguntanan haci, a sigura Parlamento di Aruba cu no tin un asina yama 'deadline' pa e proceso, pues no por papia cu Aruba a 'tarda' den e proceso aki pasobra continuamente nan tabata tratando e tema aki. Solamente cu Aruba tabata insisti riba un nomber y Hulanda tabata insisti riba un otro nomber. 

STATUUT

Mientras cu Hulanda ta basa su mes riba statuut, y cu nan a actua corecto segun e Statuut ora cu ta trata e nombramento, Eman a cuestiona e asunto aki den Parlamento na Aruba. Eman a admiti, contestando otro pregunta, cu berdad pa un corte constitutional, e situacion ta na fabor di Hulanda ya cu como cu e no ta regla den ley, pa Statuut e situacion ta describi hopi sumier unda cu ta para cu ta Gobierno di Reino ta apunta y dicidi. P'esey Eman a evalua pa bay un corte civil unda cu e chens ta mas grandi cu por evalua e situacion mas profundo y analisa tur cos enbes di solamente e hechosnan constitucional. Hecho ta cu, na final di e dia, ambos pais ta mira e situacion manera cu nan ta cumbini, y e division ainda ta existi y porta a bira aun mas grandi.