OM: Piloto y pasaheronan di avion accidenta, ta deteni!

ORANJESTAD - "Nan a keda deteni pa investigacion" tabata confirmacion di vocero di ministerio publico Ann Angela riba e situacion di e tripulacion di e avion 'misterioso' di dialuna anochi. Manera raporta caba, un avion misterioso (sin plan di buelo, sin comunicacion cu toren di control) a accidenta dialuna anochi ora cu nan a aterisa sin permiso riba pista na aeropuerto di Aruba. Ora cu e avion a baha, e tren di aterisahe (wielnan) a 'bay aden' y pues pone e avion baha riba su barica. Awe mainta tanto e piloto Colombiano como su 3 pasaheronan Haitiano ta deteni. 

DETENCION

Segun Angela, a determina cu tin suficiente motibo pa detene e personanan den e avion. " E piloot ademas su papelnan no ta na ordo" Angela a confirma. Segun Angela, investigacion lo mester mustra kico nan tabata haci aki banda, kier a haci, y kico nan tabatin planea. "Duidelijk ta en todo caso cu nan destinacion no tabata Aruba" Angela a sigui bisa.

E ACCIDENTE 

Un avioneta bi-motor tipo Astec cu 3 pasahero y un piloto a accidenta riba pista di aterisahe dialuna anochi. Informacion di aeropuerto ta confirma cu e piloto no tabatin un plan di buelo y tabata bin di Haiti, no tabatin comunicacion cu toren, y a aterisa 7:02 pm riba e banda robes di pista(29) enbes di e otro banda (11) Momento di aterisahe, e tren di aterisahe (wielnan) a colapse riba e pista. No a raporta herido, pero si daño na e avion. Pista di aeropuerto a keda temporalmente cera. Prome informacion tabata un avion a cay na Aruba, pero esey no tabata corecto. Keda pendiente pa mas info. NOTA: Foto ta di dialuna anochi ora cu Procurador General Alexander van Dam, minister di husticia Arthur Dowers, director di aeropuerto James Fazio, comandante di bombero Edward de Cuba y alto comisario di polis Dolfi Richardson tabata reuni riba pista despues di e accidente di e avioneta.