Minister: Peticion Insel Air Aruba pa Surnam den tramite ainda

ORANJESTAD – Un dia despues cu Insel Air Aruba no a wordo permiti pa bula directo pa Surinam, NoticiaCla.com tin informacion cu por ta e motibo pakico. Den combersacion cu minister di Transporte Otmar Oduber, su contesta na NoticiaCla.com tabata : “Insel Air Aruba apenas su peticion ta den tramite na Directie Luchtvaart”. Pues esaki ta nifica cu e compania no tin permiso ainda pa bula e destinacion den forma directo. Por lo menos no segun e AOC (Aircraft Operating Certificate) cu nan tin pa Aruba.  

“Si nan kier bula bao (cu e ) AOC Aruba, tin un proceso pa worde encamina. Entre otro Directie Luchtvaart tin cu haci inspeccion di airport y handling na Surnam” Oduber a sigui bisa NoticiaCla.com . Y esaki ainda no a tuma lugar, of por lo menos ta den proceso pa tuma lugar. Tanten cu esaki no sosode, NoticiaCla.com a compronde cu e aerolinea no por uza su AOC di Aruba pa efectua e buelonan ey.

Pero segun Oduber, tin un solucion temporal cu e aerolinea por haci. “ Awo, si nan kier uza AOC di Corsou, pasa via Aruba bai Surnam, e ora nan (dus Insel Cur) mester haci un peticion pa un quinta libertad tanto na Aruba como na Surnam” Oduber a sigui bisa NoticiaCla.com como posibel solucion temporal. Cu e declaracion aki, e asunto porta a bira mas cla pakico Surnam a para e buelo di Aruba pa bula directo.

Tabata dialuna atardi cu Insel Air Aruba a haye cu un problema imprevisto. Dialuna durante e buelo inaugural di Aruba pa Surnam, nan a tende cu gobierno di Surnam no ta permiti e avion bula directo for di Aruba. No obstante e hecho cu gobierno di Surnam a prohibi avion di Insel Air Aruba di bula director di Aruba pa Surnam, nan lo purba esaki atrobe diabierna awor. Insel Air Aruba no ta sucumbi pa presion di gobierno di Surnam segun e CEO di e compania, Frederic Nuboer a sigura NoticiaCla.com diamars den un reaccion for di Surnam.