Awe marduga Aruba a conoce su di 9 morto den trafico

PALM BEACH - Aruba a conoce su di 9 morto di trafico pa e aña aki den fin di siman. Tabata diasabra 22 di october pa mas o menos  7:15 pm cu a sosede un accidente basta fuerte entre un auto y un dama turista peaton riba e caminda di Sasakiweg un poko pabou di Superfood.  Na yegada di e prome patruya a pidi pa un ambulance urgentemente mirando cu e dama turista peaton tabata mustra basta grave. A pidi tambe pa specialista di trafico, polis forensico y slachtofferhulp. E auto Honda CRV lo a alcansa e dama peaton cu tawata crusando caminda. A bai over di biaha na cera e caminda pa asina specialista di trafico por a cuminsa cu e investigacion. Tambe a test e chauffeur, cu a supla zero.

DAMA TA FAYECE

Pero lamentablemente dialuna madruga pa 2:45 am dr Segers ta constata morto di e turista Alena PIEVOVA naci na Republica di Slovakia, 20 di mei 1953.  Esaki ta di 9 morto den trafico. E tabata hospedando na La Cabana. Departamento di slachtofferhulp lo asisti e famia den e momento dificil aki pa por regla tur cos pa asina e famia por bay cu nan ser keri bek na su pais. Cuerpo Policial y NoticiaCla.com kier a manda palabra di condolencia na famia di e fayecida. Tambe Cuerpo Policial kier a keda recorda nos automobilistanan cu nos ta drentanto e temprorada di fin di aña cu ta semper druk. Dus ban baha man na velocidad halto, respeta reglanan di trafico. Si bo ta bebe no stuur y si bo ta stuur no bebe, bisti safetybelt y wak pa nos muchanan ta den nan carseat sinta patras.