Cinco homber arma a atraca comerciante na Papaya

ORANJESTAD - Cinco hende homber a tira un atraco riba un comerciante na Papaya awe marduga. Segun version oficial di vocero suplente di polis Liliana Rasmijn, pa mas o menos 3:15 di awe madruga central di polis a haya un yamada bisando cu na Papaya 2N nan a caba di wordo atraca. Central di polis inmediatamente a manda un patruya pa e cas. Ta trata di un cas di  comerciante doño di e restaurant 'Sabor Zuliano'. Segun declaracion di e victimanan, nan lo a caba di yega cas y diripiente a sali 5 hende homber tur cara tapa y tur cu un arma di candela den nan man for di e mondi banda di e cas. E atracadornan a bisanan pa drenta den e cas. Tur 5 atracado ta habla spaño. Nan tur tawata tin jeans bisti y keds.  Eynan nan a pone e victimanan drumi abou y tapanan cu un klechi pa asina no wak kico tawata pasando. Nan a reboltea e cas y bay cu 5 telefoon cellular, joyas, paspoort y un total di mas o menos afl 20.000. A pidi di biaha pa atraco team, slachtofferhulp y tambe polis forensico. E caso ta bou investigacion. Ken cu por a wak of scucha algo yama tiplijn 11141.