Studiantenan local y den region no a haya placa pa fayo di Dept. Enseñansa

ORANJESTAD – E problema pa cual studiantenan na Aruba y den region no a haya nan placa ainda no ta pasobra presupuesto no firma, sino pa fayonan administrativo den propio Departamento di Enseñansa. Esaki a keda confirma pa minister di finanza Angel Bermudez na NoticiaCla.com diamars. “No ta pasobra no tabatin placa, nan no a haye. Pasobra e asunto administrativo no tabata na ordo” e titular di finanza a coregi declaracionnan haci pa e propio hendenan di e departamento concerni.

Den curso di dia diamars, e departamento di enseñansa a haya un avalancha di studiante cu tabata indigna, fada y algun tabata hasta yorando. “E ta un chaos total” un mayor indigna a bisa NoticiaCla.com. “Studiantenan no por cumpra buki y no por paga nan placa di scol tampoco. Nada no ta regla!” e mayor a sigui bisa. Loke tabata indigna nan mas ainda ta cu nan no por a haya contesta di parti di e departamento. “Nan ta culpa gobernador y cu presupuesto no ta firma ainda” e mayornan tabata haya como contesta di esnan na departamento di enseñansa.

Segun Bermudez, e filesnan na departamento no tabata completo pa e otro departamento (di finanza) por a haci e pagonan. “Pa haci nan completo, tur cos a cay laat. Door di esey e pago tabata atrasa” e mandatario a confirma na NoticiaCla.com. “Pero no cu ta pa motibo di placa cu nan no a wordo paga na tempo!” e mandatario a sigui bisa.