E loke realmente a sosode cu nombracion di Boekhoudt riba varios plataforma

ORANJESTAD/DEN HAAG - Mientras cu siman ta habri cu Parlamento yamando minister presidente Mike Eman pa 'duna cuenta' riba su bishita reciente na Hulanda unda cu Eman no a logra convence Hulanda pa revoca e nombracion di Gobernador pa pais Aruba, e intento pa susha nomber di e candidato cu a haya e nombracion caba, ta sigui. Entre nan, e forma con e candidato, Alfonso Boekhoudt lo a haya e funcion di minister plenipotenciario, y tambe kico realmente a sosode e ultimo simanan pa cu e candidatura di Boekhoudt pa Gobernador. 

NOMBRA BOEKBOUDT PA MINISTER PLENIPOTENCIARIO

Pa cuminsa, atrobe fuentenan cerca di e proceso a confirma na NoticiaCla.com, e nombracion di Boekhoudt como minister plenipotenciario no a bay manera cu prome minister Eman a presenta. Berdad cu un yiu di Boekhoudt tabata malo y mester a haya tratamento na Hulanda. Boekhoudt sinembargo ya caba a planea e biahe y proceso pa e recuperacion di e yiu. Manera cu por a compronde, e biahe tabata traha caba, tur cos regla y consecuentemente e casa y yiu di Boekhoudt a biaha for di  comienso di juni aña 2013 pa Hulanda.  Pero ta ora na oktober 2013 den seno di gobierno cos a tranca pa nombracion di un minister plenipotenciario (varios persona a cay afo di e lista), Boekhoudt a wordo acerca pa e funcion ey, si e tabata interesa. Gobierno a tende cu Boekhoudt tabata solicitando na Hulanda pa muda cu su famia.  Ambos partido por a beneficia di e situacion y e ora a dicidi cu Boekhoudt ta acepta e funcion. "Pero no ta asina cu Boekhoudt a bay pidi gobierno un fabor pa e bira e minister en cuestion. Como tal, "e no tin ningun fabor pa duna bek den e caso aki" e fuente a sigura NoticiaCla.com. 

NOMBRACION COMO GOBERNADOR

Pa loke ta e nombracion como gobernador y henter e asunto di lista di nomber, NoticiaCla.com a compronde cu contrario na e forma con e ta wordo presenta dilanti, debidamente Boekhoudt su nomber a bin dilanti anteriormente pa e funcion di Gobernador prome. Investigacion cu NoticiaCla.com a haci, ta mustra cu ta for di comienso di november aña pasa (2015), minister di asuntonan di Reino (BZK) tabata na Aruba y a informa  prome minister Mike Eman cu 'e ta considera Boekhoudt como un bon candidato' pa bira Gobernador di Aruba. 

Oficialmente, e nomber a cay ora cu na a april/mei di e aña aki (2016) Hulanda a dicidi di bai pa siguiente paso den procedura di nombracion door di sostene un combersacion cu e candidatonan. Aki ta unda cu ta aparece dos nomber como candidato, entre nan Alfonso Boekhoudt como candidato. Y mas informacion ta mustra cu Eman lo a bay di acuerdo cu e lista ey, of cu por lo menos e no tabatin obhecion cu e lista ey. Pues esey ta mustra cu e candidatura no tabata un sorpresa. Y finalmente, fuentenan cerca di e reunion tanto na Aruba como na Hulanda, ta mustra NoticiaCla.com cu berdad cu Boekhoudt a wordo pidi pa manda un carta pa conseho di minister di Reino, protestando formalmente riba e proceso cu a sigui pa yega na un candidato, cual carta Boekhoudt a manda tambe. Pero segun e fuente, ningun momento Boekhoudt a wordo pidi y of exigi pa su coleganan pa 'rechasa' e funcion di Gobernador. Es mas, ministerraad no por dicidi cu un candidato ta hala atras. Sinembargo, apenas algun dia despues, den seno di gobierno nan ta declara otro cos. Como tal no por considera Boekhoudt como traidor, pasobra e no a palabra nada te pa bay bek riba su palabra. Es mas, esun cu si a hunga un rol dudoso pa nos pais ta Gobierno mes. Pasobra pueblo mester sa di e gobernantenan ta di con nan no a protesta oficial prome of durante e reunion den e conseho di minister di Reino.  De hecho, NoticiaCla.com a publica prome cu e reunion caba cu gobierno lo mester a haci uzo di "intern appel" pa para of influencia e proceso.

Pa loke ta e candidadura di Boekhoudt Noticiacla.com a compronde for di e mesun fuentenan, cu repetidamente lo a bisa Eman cu si e wordo proponi, cu no ta keda na dje pa hala atras y influencia e nombracion pa un cierto candidato, y unda cu Eman no a rechasa esaki. Ademas, elo a bisa Eman cu 'ta na gobierno di Aruba hunto cu gobierno di Hulanda pa dicidi ken ta bira e persona'. 

REUNION PARLAMENTO

Mientrastanto awe mainta den parlamento, fraccion di AVP lo presenta un lista di pregunta pa cual, for di informacion cu NoticiaCla.com tin, cada parlamentario tin 1 minuut pa haci, pa despues e respectivo minister contesta. For di e lista di pregunta, mester surgi e contestanan pa haya claridad. No ta conoci kico lo       resulta for di e reunion aki, ya cu segun lider di fraccion berde Rene Herde mes a bisa NoticiaCla.com, Parlamento no tin instrumento pa haci algo pa cambia e scenario cu a presenta. Ademas, den e forma cu e reunion a wordo pidi, esta un vragenuurtje, no por presenta mocion cu lo por tin un of otro impacto pa un posibel cambio. Foto cortesia Volkskrant.