SMAC y KPA a tene prome reunion pa carnaval 2017

ORANJESTAD - SMAC recientemente a sinta hunto cu Korps Politie Aruba pa asina discuti e temporada di Carnaval 63. Durante di e reunion SMAC tabata representa pa miembronan di su Directiva, Presidente Sra. Henriquez y Secretaria Zuleika Wever, como tambe representante di Raad van Toezicht di SMAC, Sr. Hubert de Cuba. Delegacion di KPA tabata encabesa pa Sr. Soemers y acompaña pa representantenan di districto di San Nicolas, Oranjestad y Sta. Cruz, como tambe PR di KPA, Sra. Liliana Rasmijn. 

SMAC y KPA ta convenci cu hunto por yega na un relacion estrecho y duradero entre nan dos, prome, durante y despues di temporada di Carnaval. Ta di acuerdo cu orden publico y seguridad di participantenan y publico ta keda prioridad y e meta principal di ambos SMAC y KPA. Di e manera aki ta sigura cu tur hende, carnavalista, publico y bishitantenan por gosa optimalmente durante eventonan y paradanan. 

Den e prome reunion aki a presenta na KPA e schedule tentativo pa Carnaval 63 pa di e forma aki haya conseho y aprobacion di KPA pa fechanan y rutanan stipula pa eventonan y paradanan. Hunto a repasa y yega na un consensus riba gran parti di e schedule. Ainda tin algun puntonan cu lo mester ahusta y confirma. Consehonan ariba por ehempel; iluminacion suficiente na cierto puntonan, cantidad di agente policial pa cada grupo di Carnaval y orarionan di diferente eventonan y paradanan lo yuda SMAC cu e organisacion di Carnaval 63. 

Den e lunanan nos dilanti lo cuminsa cu e stakeholders meetings, cu lo tuma lugar frecuentemente y durante e temporada di Carnaval lo subi e frecuencia pa tur siman. Esaki ta un reunion cu lo consisti di representantenan di KPA, Brandweer, IMSAN (Ambulance), DOW, DTI, DESPA y Serlimar. Esaki ta pa hunto evalua cada evento pa mira unda mester tin cambio of mehoracion pa tur cos cana bon. 

SMAC kier gradici Korps Politie Aruba, Sr. Soemers y demas miembronan presente pa ricibi SMAC den nan seno, tambe pa tur conseho y positividad. 

SMAC lo sali afo dentro di algun dia cu nan prome Conferencia di Prensa, pa presenta e cuenta anual, despedi di Presidente saliente Sr. Randy Thiel, introduci e Presidente y directiva nobo di SMAC oficialmente y alaves lo anuncia e prome evento riba e calendario cu lo ta riba 11/11.