Fraccion AVP kier claridad riba nombracion Gobernador

ORANJESTAD - Fraccion di AVP den Parlamento kier sa pakico a cera un areglo y mas importante,  kico e areglo yega na dje diamars entre ministernan Plasterk y Eman ta nifica pa loke ta nombracion di e Gobernador nobo. Y mas aun ki consecuencia esaki por tin (pa Aruba). Esaki ta meramente un di e preguntanan di e lista di mas di 20 pregunta di e fraccion berde, pa un reunion pidi pa tuma lugar mas tarda dialuna awor, pa trata e topico di nombracion di Gobernador nobo di Aruba. Cu un lista di por lo menos 20 pregunta, fraccion di AVP kier claridad riba e asunto aki mas lihe cu ta posibel. Manera ta conoci, e fraccion no ta contento con cos a bay, aunke oficialmente nan no a emiti un reaccion como fraccion, asina lew cu NoticiaCla.com ta na altura. 

PREGUNTANAN

Entre e preguntanan, e fraccion kier sa di e.o. prome minister Mike Eman, si e proceso di nombracion manera stipula na 2001, ta vigente ainda. Mas di e preguntanan ta dirigi den stipula si e proceso a bay corecto, esnan cu ta envolvi a haci nan trabou, kico e tarea respectivo di e mandatarionan tabata of ta den e caso aki. 

CLARIDAD

Tambe kier claridad riba e situacion di candidatonan, cuanto cantidato tabatin pa cu esaki, ken nan tabata y ki ora nan a wordo poni riba un lista. Nan credencial tambe ta importante pa wordo analisa riba e topico aki. 

KEN TA RIBA LISTA

Un pregunta cu tambe ta figura riba e lista, ta ki dia y pa ki motibo  conseho di minister di Reino a desaproba e proposicion di conseho di minister di Aruba. Aki ta importante pa haya claridad mirando cu esaki ta un punto hopi discuti ultimo dianan. Tambe ta cuestiona e proposicion di minister Plasterk den e caso aki y fraccion di AVP kier sa con esaki a bay, y si esaki a bay conforme e reglanan stipula.  Por lesa gran parti di e preguntanan haci, aki. No ta conoci ki ora e reunion lo tuma lugar dialuna, ni si esaki en realidad ta e fecha pa e tuma lugar.