FCCA ta inverti den cas pa grandinan y canchanan deportivo den barionan rond di Aruba

ORANJESTAD – Gobierno ta contento cu  FCCA ta bin cu mas cas pa 60+ den nan mesun bario. Esaki minister di infrastructura Benny Sevinger a expresa durante un ceremonia di FCCA diahuebs atardi.

Un ceremonia unda cu e mandatario tabata presente hunto cu representante di diferente contratista cu a gana e diferente destahonan cu FCCA, a tuma luga firmamento di contracto di construccion pa diferente proyecto di Fundacion Cas pa Comunidad Arubano cu ta yega na rond di 15 miyon florin total. Ta trata di diferente proyectonan di vivienda y facilidadnan di recreacional rond di Aruba. 

Director di FCCA, Peter van Poppel, den su discurso a splica cu despues di varios luna di preparacion, pa entre otro haya permisonan di construccion y destahonan, a yega e momento pa firma e contractonan. A firma cu companianan manera Coburg Construction, Albo Aruba N.V., Eljo Infra, Arubaanse Wegenbouw y Calidad Construction. E proyectonan ta encera expansion di e proyecto di vivienda na Kiviti (cu antes tabata Palisiaweg), Casnan pa Grandinan na Savaneta y Cunucu Abou, construccion di e proyecto sostenibel na Kibaima, facilidadnan di recreo na Cura Cabay Zuid. 

E tempo di construccion pa e proyectonan aki ta varia, di cual mayoria mester ta entrega den e prome mita di 2017.