Un di e pioneronan di aviacion a lanta su vuelo final

Dia 1 di October 1930 tabata un dia hopi feliz pa Dr. Cobito y Shon Adi Oduber ora cu nan a wordo bendiciona cu un yiu homber masha special cu nan a yama Harold. Nan filosofia fuerte y rigido a inspira Harold pa crece y biba cu norma y balornan cu a domin’e henter su bida. E disciplina y etica aki pa algun tabata dificil pa comprende, pa otro altamente aprecia pero pa tur hopi respeta. For di un edad jong Harold a traha prome den Botica Aruba como “hulp apotheker” y despues cu solamente 21 aña e habri su propio botica (Botica Oduber). Cu 23 aña el a casa cu su gran amor Fanny y e matrimonio a duna nan 4 yiu, Marisela, Jacobo, Eddy y Gerardo. Hunto nan a celebra 60 aña casa e aña aki.

Hopi cu a conoce Harold tin biaha tabata pensa cu e rigides cu e la hereda di su mayornan tabata strob’e di gosa di bida. Reglanan pa su mes, pa esunnan cu e tabata stima y mas cerca di dje, pa esunnan cu tabata traha cune hopi biaha tabata asina fuerte cu hopi no tabata comprende. E realidad ta cu ta e rigides aki ta loke a haci’e exitoso y ta e reglanan di bida aki tabata pone logra su metanan cu e tabata pone su dilanti. E balornan cu su mayornan a pasa pe tabata e motor di su exito y pa gran parti di su bida el a traha 7 dia pa siman 14 pa 16 ora pa dia. Hopi biaha tabata dificil pa distingui entre su trabou y su hobbynan ya cu tur e tabata haci cu mes hopi pasion.

For di hoben Harold tabata gusta un paranda. Algo straño considerando cu nunca el a bebe un gota di alcohol. Cu su guitara, cuarta of “tre”, e paranda e tempo ey tabata toca y canta rond di Aruba coriendo cu su amigonan den su Buick Convertible ta duna serenata na cualkier mucha muhe bunita cu ta tin un rato pa para na balcon scucha nan.

Un di Harold su gran amigonan tabata Boy Eman cu a introduci’e na bulamento. For di e dia ey a nace un pasion den dje cu a dura pa resto di su bida. Cu 19 aña e la saca su licencia pa bula y su prome avion tabata un avion di un motor, traha di paña, cu e la cumpra sin cu su mayornan sa, pa miedo cu nan lo a prohibi’e di haci loke e la descubri ta e cos cu mas e tabata gusta. Aviacion a bira su bida. Ademas di traha den su negoshi di agencia for di marduga, ya pa 2or di merdia y te anochi laat e tabata na Oduber Aviation.

Su hobby chikito a bira un negoshi cu 13 avion y dunando servicio na miles di avion di afo y local. incansablemente e tabata te anochi laat y sin tin weekend. Si no tabata pa Fanny cu tabata hiba cuminda pe den un macutu un of dos biaha pa dia, e por a keda sin come mes basta cu e avion cu nan tabata traha riba dje, keda cla.

Harold semper tabata cla pa manera e tabata yam’e: "tira un biahe." Sea ta cu amigo, su famia of pa trabou, ki ora cu ta e por a traha un "excuus" pa drenta avion y tira un biahe, e tabata haci’e. Bula pe tabata genera un serenidad inmenso. Normalmente Harold no tabata hende pa sinta keto pero ora cu e tabata bula, cu su cup di koffie den man, e por a sinta ora tras ora ta wak horizonte mescos cu un mucha chikito cu su coy hunga preferi. Ora cu e tabata pilotia su avion tur stress y preocupacion di mundo tabata disolve pe.

Tabata masha normal pa un Diabierna yega cas atardi y bisa su casa y yiunan: "ban, nos ta bay dal un buelta na ...". Asina e la biaha pa mayoria di isla den Caribe: Curacao, Bonaire, St. Maarten, Trinidad, Puerto Rico y mucho mas. Pero tambe vuelonan mas leu manera Margarita, Caracas, Medellin, Panama, Quito y mucho mas leu manera Memphis, Wichita, Washington, Dallas, Los Angeles, Toronto y Quebec. Su soño tabata pa bula cu su avion pa Europa. Oranan largo e tabata calcula e ruta di con pa bula, te ora cu e ta tin’e. E la planea pa biaha via Caribe pa costa di Merca, Canada, e paisnan Scandinavio pa yega. E biahe a keda na un soño pe. Tabata hopi dificil pe dia cu e mes no por a bula mas pero asina mes ainda den su ultimo añanan e tabata gosa un "biahecito" cu Eugene. Despues di un biaha asina of un biahe pa Miami su wowo tabata lombra di alegria mescos cu ora e tabata djis pasa un rato "pa nort" manera e tabata yama Oduber Aviation pa wak con tur cos tabata eybanda. El a aprecia hopi cu a yama un sala na su nomber na Universal Aviation, pues na nos aeropuerto priva.

Pa hopi aña Harold a siña hopi piloto na Aruba bula. Te awe hopi di nan ta menciona su nomber den cualkier combersacion di aviacion. E gran mayoria di nan e la siña sin cobra y tabata haci’e den su tempo liber y strictamente pa amor pa aviacion.

Mayoria hende tabata conoce Harold pa su bulamento y pa su trabou nan comercial. Pero esey tabata un parti chikito di su bida. Ademas di tabata piloto, hulp apotheker, comerciante y un musico ferviente, e tabata tambe un tecnico licencia (e mes tabata arma radio y television), un “Licensed Aircraft Maintenance Engineer” incluyendo pa por traha ariba jet, un FAA inspector, miembro di Vlieg Examen Commissie di Antias Hulandes y despues di Aruba. Tambe e tabata un di e presidente nan mas jong di Rotary na Aruba, bestuurslid di Aruba Boating Club, Kamer van Koophandel, Rode Kruis, Aruba Flying Club y tabata un radio amateur. Su pasion pa studia y siña mas tabata por a wordo ripara na e cantidad enorme di diploma colga tur caminda na su trabou y oficina for di specialisacion di motor pa diferente tiponan di avion cu e por a drecha of bula.

Pa hopi aña Harold tabata boluntario y regularmente tabata forma parti di “Search and Rescue Missions” buscando botonan perdi rond Aruba. Tambe e la haci masha hopi vuelo di ambulance entre Aruba, Curacao y Bonaire. Aunke cu nunca e la gusta pa ningun hende sa, Harold tabata haci masha hopi obra caritativo na diferente forma manera donacion, sponsorships na organisacionnan caritativo, schoolnan, kerki y diferente otro organisacion. E ultimo aña nan di su bida malesanan a domin’e pero asina mes nunca e la keha di un dolor. Semper yen di energia pa enfrenta bida y logra e meta cu e la pone su dilanti pa e dia ey. Semper cu un bon conseho pa tur hende ariba con pa cuida y mehora nan salud. Semper preocupa cu e salud di otronan. Riba 17 di Augustus ultimo nos a perde un gran persona, un comerciante, boticario, musico, mecanico, tecnico, radio amateur, un consehero y mucho mas. Mundo di aviacion a perde un pionero y e unico consuelo ta di pensa cu awe Harold probablemente lo ta den e pilot-seat sinta banda di papa Dios. Pa, Harold, danki pa tur cos cu bo a significa pa nos, nos lo haya bo falta! Hopi falta!