Famianan: A troce noticia di accidente di auto di Boekboudt na Hulanda

DEN HAAG/ORANJESTAD - E noticia di accidente di auto di minister plenipotenciario na Hulanda ta trocí, y no ta berdad den e forma cu ela wordo presenta. Asina fuentenan cerca di famia di minister Boekhoudt a splica NoticiaCla.com. Mientras cu tanto Aruba como Hulanda a yega na un 'acuerdo' cu ta acepta e nombracion di Alfonso Boekhoudt como proximo Gobernador, intentonan pa atacha su nomber, a y ta continua. Entre nan pues, un noticia cu a keda publica den e matutino Hulandes na Corsou Antiliaans Dagblad riba un incidente di auto di e minister plenipotenciario. 

E RAPORTAHE

E raportahe cu a keda publica (y reproduci den varios medio) ta haci mencion cu e auto di trabou di e minister plenipotenciario tabata envolvi den un accidente. Y segun e articulo, riba e hechosnan tin un silencio di parti di esnan envolvi. Segun e articulo, Boekhoudt lo a raporta e incidente cerca su hefe Mike Eman, pero lo no a bisa cu no ta su chauffeur of e mes tabata tras di stuur di e auto, sino su yiu homber. "Esey a sali na cla despues" e articulo ta sigui bisa. E raportahe ta bisa cu e accidente a tuma lugar fin di siman cu a pasa. Algo cu tampoco no ta cuadra. E auto, Mercedes Benz, lo a keda total loss a consecuencia di e accidente. 

E HECHONAN

For di e fuentenan di e famia di minister Boekhoudt, NoticiaCla.com a haya e detayes di loke realmente a sosode. "E tabata un ocasion priva, unda cu riba un diasabra algun tempo atras, e yiu tabata bayendo pa cas di suegra di Boekhoudt" e famianan a bisa."E chauffeur no ta core priva pa e minister. De hecho, (e famianan ta sigui conta), e yiu ta oficialmente registra na e compania di seguro, como un di e chauffeurnan pa e auto, y ta core e auto den fin di siman. E auto y e yiu berdad tabata envolvi den un accidente, pero e accidente a wordo causa pa e contra partido y no su yiu, y e seguro a cubri e daño. Segun e fuentenan cerca di e famia, e accidente a keda raporta pa Boekhoudt, pero ta algun dia despues prome minister a yama puntra p'e. "Nunca a puntra pa e yiu(nan), y diripiente ta preocupa pa e auto", e famianan a sigui bisa. Como tal ta mustra cu ta sigui buscando cosnan pa purba difama Boekhoudt pa su nombracion como Gobernador, e fuentenan cerca di e famia a finalisa bisando. Foto cortesia Volkskrant.