Donald Trump ta blunder durante ultimo debate presidencial

LAS VEGAS - Cualkier chens cu e candidato presidencial republicano Donald Trump tabatin pa drecha su imagen, a bay perdi, y ta practicamente sigur cu su contrincante Hillary Clinton, e candidato democrata, lo bira e proximo presidente Mericano. Asina expertonan y analistanan ta relata despues di e di tres y ultimo debate presidencial diaranson anochi na Las Vegas. Principalmente debi na algun declaracionan haci durante e debate, esaki lo keda persigui Trump y tambe crea aun mas problema p'e. E encuesta di CNN despues di e debate a duna Clinton e debate gana cu 52% contra 39% pa Trump. De hecho, e mesun encuestanan anterior ta duna Clinton tur tres debate gana. 

FAYONAN DI TRUMP

E prome mey ora Trump a contene su mes perfectamente, sin interumpi y hasta tene su mes na e contenido di e preguntanan haci. Pero despues di mey ora, e arogancia di Trump a keda desplega y na varios momento a haci declaracionan cu no a cay nada bon. Entre nan, 'E ta asina desagradabel", refiriendo na Hillary Clinton, durante cu Clinton tabata contestando un pregunta. Pero e blunder mas grandi di e anochi, ta ora cu Trump no por y kier a confirma cu elo acepta y concedi e resultado di e eleccion dia 8 di november proximo. "Mi no sa. Mi lo tene'bo den suspenso te e ora ey" Trump a contesta e moderador Chris Wallace diaranson anochi. 

PERSIGUI TRUMP

E contesta ey pa Mericanonan ta un fayo, y por persigui Trump pa un tempo largo. Historiadonan a trece dilanti mesora cu hasta e contrincantenan mas fuerte presidencial den pasado, no tabatin problema pa concedi y acepta e resulta di eleccion. Merca ta considera esey e base di democracia, ora cu por tin contrincante, pero cu ora cu tin resultado, tur hende ta para su tras, y laga tur diferencia atras pa e futuro di e pais. Algo cu Trump no kier a haci (ainda). Mesora den un intento di 'drecha cuenta', su conseheronan y voceronan a bisa cu 'Trump claro lo acepta e resultado y concedi esaki!'. De hecho algun a bisa cu Trump no kier a concedi simplemente pasobra e ta considera cu elo gana e eleccion, pa cual e no tin cu concedi. E eleccion ta aki 19 dia na Merca. Foto cortesia Business Insider.