Aruba Hotel Enteprises ta gana caso contra Blossoms

ORANJESTAD - Corte a dicidi na fabor di Aruba Hotel Enterprises NV (conoci como Riu Antillas) contra e compania The Blossoms Group, (conoci como e restaurant Blossoms) den un caso cu a dura 2 aña y cu a trece claridad di un disputa largo entre dos partido. Entre e logro di e veredicto, RIU no debe e restaurant nada di placa (Blossoms a pidi daño y perhuicio di 1.7 miyon florin durante periodo di reconstruccion/remodelacion di e hotel na 2014), y RIU tabata ok pa cambia e modelo di hotel di uno EP (European Plan) pa AI (All Inclusive) ora cu el a cumpra e hotel na 2013. Ademas, debi na incumplimento di Blossom pa suministra documentonan anual e.o. cifras financiero, RIU por kibra e contracto cu e restaurant fin di e aña aki. Algo cu e hotel tin cu delibera si esaki lo sosode, segun abogado di RIU, Ronny Wix. 

E CASO

E caso a cuminsa for di dos aña pasa ora cu RIU a tuma e hotel over (di Westin) na 2013, pero tabata na 2014 cu e prome demanda a bin ora cu RIU a anuncia clausura di temporal pa por remodela/reconstrui e hotel. Blossoms a demanda un suma miyonario di 1.7 miyon florin pa dañonan cu por y lo sufri durante e periodo aki. Ademas a exigi pa no paga huur durante e periodo aki. E prome caso di daño y perhuicio na 2014 Blossoms a perde caba. Pero atrobe awor a bin cune y atrobe diaranson den e sentencia a perde esaki. Un otro sentencia den contra di Blossoms, ta e hecho cu debi cu e restaurant no por a cumpli cu su obligacion contractual di presenta documentonan anual manera cifra na ora, nan ta den violacion di nan contracto pa cual RIU tin derecho di termina e contracto entrante fin di aña. 

BAY BIN DI DISPUTA

E caso ta finalisa 2 aña di disputa entre e dos partidonan aki. Un bay bin formal unda cu cada partido tabata argumenta nan punto, for di e forma con e hotel mester a wordo opera, te na con e restaurante mester a sobrevivi den e periodo di reconstruccion y adapta su mes den un hotel estilo all inclusive. E hotel, segun abogado Wix, a bin dilanti den varios momento, pa acomoda e restaurant, ofreciendonan entre otro forma pa termina e contracto prome cu tempo, pa asina nan por a realoca na un otro sitio, inclusive paga e prome 4 luna di e huur nobo di e localidad nobo. Pero Blossoms Group a rechasa esaki tambe. Blossoms na un ocasion a pidi pa paga huur te ora cu e hotel su grado di ocupacion pasa 75% etc. NoticiaCla.com no a haya e version ainda di e abogado di Blossoms Group, pero por lesa e veredicto completo di 10 pagina aki. E caso por wordo apela segun abogado di Aruba Hotel Enterprises, Ronny Wix.