Arends: Cu PDVSA no por paga creditornan, no ta afecta CITGO Aruba

ORANJESTAD - E informacion di un posibel 'fayo di pago' di parti di e compania PDVSA na su creditornan fin di oktober no lo afecta CITGO y su companianan afilia incluyendo CITGO na Aruba. Asina e negoshador principal di e CITGO deal pa Aruba, Richard Arends, a sigura NoticiaCla.com diaranson. Segun rednan internacional, tin chens cu pa fin di luna, PDVSA no por paga e prome di dos pago biyonario na su creditornan cu ta nifica cu nan ta drenta den 'default', esta incumplimento di pago. Consecuentemente inversionistanan lo no inverti mas serca nan.  

E DEBE DI PDVSA. 

E compania Venezolano (PDVSA) debe $1.6 billion na bono y interes cu mester ta paga pa dia 28 di october y un otro pago di $ 2.9 biyon dia 2 di november proximo. E compania a faya sinembargo pa convence inversionistanan pa bay di acuerdo cu un deal, cu ta laga PDVSA paga e debe mas laat (aki tres aña) enbez di fin di e luna aki. Mirando cu no a logra convence inversionistanan pa tuma e deal aki, a prolonga un deadline pa diabierna awor pa inversionistanan tuma e deal nobo. No ta conoci si PDVSA lo faya e pago, of logra cu inversionistanan bay cu nan plan pa extende un forma di pago. For di momento cu e noticia aki a sali, el a preocupa hopi na Aruba, cu ta pensa cu si PDVSA no tin placa pa paga su creditornan e sumanan biyonario, siendo e compania madre di CITGO, con ta bay haci cu e financiamento di e deal pa Aruba. Aruba mester di entre 500 pa 700 miyon dollar di inversion pa restart e refineria. 

ARUBA SU PENSAMENTO

Segun Arends, no mester tin motibo di preocupacion. "Basicamente e informacion financiero cu nos a hanja p.e. durante e negociacionan e.o. di e rating agencies ta indica cu un default di PDVSA no necesariamente tin efecto riba CITGO y su companianan afilia" Arends a sigura e portal aki. "E deal di CITGO ta on. Kico cu pasa na Venezuela, no ta motibo pa no cumplimento (na Aruba)". Ademas, Arends ta splica cu e compania madre di e companianan na Aruba ta un LCC Mericano. "CITGO Aruba Holding LCC ta cay bou di e mesun regimen cu tur otro CITGO affiliates", Arends a sigui bisa. Analistanan financiero na Aruba, ta pensa otro. "Si nan (PDVSA) bay den default, ningun hende lo fia nan placa mas. Y nos pregunta ta, con den nomber di Dios nan lo por inverti den Aruba, of haya inversionistanan cu kier inverti na Aruba. Cu cua placa". Nan ta pensa asina, basa riba e hecho cu PDVSA ta doño di CITGO. Foto Hilario Doncker.