Cu intermediacion di Bermudez, CFT a haya acceso pa investiga

ORANJESTAD – Ta riba sugerencia di minister di finanzas Angel Bermudez, cu gobierno a cuminsa coopera cu e comision di secretariado di College Financieel Toezicht. Esaki e mandatario a confirma na NoticiaCla.com diamars atardi laat. “Ami a propone pa gobierno duna e informacionnan cu CFT ta buscando” Bermudez a bisa. Pero no ta asina cu e comision ta haya carte blanche y cana drenta tur caminda pa haya e informacion. “Nos a apunta dos cordinado y esey ta pone cu CFT por haya e datonan cu nan tin mester”. E kier duna e impresion asina cu gobierno ta transparente y CFT ta haya loke nan ta pidi, semper y cuando cu e wordo bon coordina.

E cambio di pensamento a bin segun Bermudez, ora cu nan a haya e prome ‘draft’ esta e quick scan di CFT algun siman atras, y a nota un cantidad di ‘fout’ den dje. Y como cu mayoria di e trabou cu CFT ta investigando, ta trata e ministerio di Bermudez, ta na su mesun interes si CFT haya e informacion mas corecto. Y mas lihe e comision keda cla, mas lihe CFT por caba cu nan trabou y mas lihe por aproba e presupuesto pa tur hende por finalisa nan trabou pa presupuesto 2015 tuma lugar. “Nos ta spera cu pronto e asunto di KB aki termina y cu cierto momento gobernador por haya su raportahe y asina e por tuma decision final pa loke ta e presupuesto 2014”

Segun su informacion, e trabounan ta canando lihe awor segun e corespondencia cu e ta ricibiendo via su coordinadornan. “Tanto loke nan (e coordinadornan) ta haya como pregunta como kico nan ta duna como contesta. Nos tin en todo caso un bista riba e comunicacion y e cooperacion”. Esaki ta pone cu e no ta kere cu ta bay tin sorpresa devastador cu ningun hende no tabata na altura. Ora cu e la wak e quick scan e la nota varios cos cu no tabata corecto. Y a base di esey, ‘eigenlijk’nos mester gewoon laga gobernador haci e trabou cu nan a instrui e pa e haci pa nos por formalisa e trabou’.