KVK ta sostene nombracion Boekhoudt pa Gobernador

ORANJESTAD - Camara di Comercio a manda palabra di felicitacion den direccion di Alfonso Boekhoudt como nos proximo Gobernador di Aruba. Asina presidente di KVK Daphne Lejuez a reacciona riba henter e asunto di e nombracion. "Al igual cu tur hende, nos a haya e noticia via medionan di publicacion unda cu nos a ripara cu e nombracion di meneer Boekhoudt a keda confirma aparentemente pa un KB" Lejuez a bisa. Como tal ta mustra cu e tabata confirma, y a manda como tal palabra di felicitacion. "Nos ta wardando anciosamente pa su yegada" Lejuez a bisa. 

PROCESO DI NOMBRACION

Pa loke ta e proceso di nombracion, KVK nunca no ta envolvi y como tal no por a bisa nada riba e parti aki. No obstante cu ta usual cu normalmente gobierno ta busca un 'draagvlak' amplio den un caso asina. "Como Camara di Comercio nos no ta envolvi den esaki" e presidente a sigui bisa. Pero den e caso aki, KVK ta positivo cu e escohencia aki di Hulanda y ta kere cu e ta un bon candidato. "Mi ta kere cu e lo representa Hulanda y nos isla dignamente. Pues nos ta contento cu e choice" Lejuez a finalisa bisando.