No a atende puntonan di comision pro seguridad ainda

ORANJESTAD - Cinco dia despues di e manifestacion, parce cu ningun di e puntonan cu e comision di seguridad cu a organisa e marcha siman pasa, a wordo atendi y na lugar di esey, Minister di Husticia Arthur Dowers a subi avion. Asina e grupo ta raporta pa medio di un comunicado. Segun e grupo, minister Dowers no mester duna MEP, ni niun sindicato un contesta, pero e mester para firme y responde pueblo cu e puntonan cu a wordo treci pa'dilanti. A inclui un copia di e manifiesto pro seguridad pa asina tur hende ta informa di loke a wordo pidi y e timeframe cu a wordo duna pa Gobierno di Aruba actua.

NIUN ACCION

Bek pa e relato, a compronde pues cu despues di e marcha aki, caminda hende di tur condicion y color politico a mobilisa, Gobierno di Aruba no a tuma accion, loke ta demostra cu nan no ta tene na cuenta cu e peticionan di e ciudadanonan." Un biaha mas Comision ProSiguridad ta urgi nos gobierno pa actua di manera responsabel y enfoca riba e crisis di inseguridad cu Aruba ta biba aden. Lamentabel ta cu despues cu Gobierno di Aruba a firma un compromiso cu nos tur pa pone siguridad como priorioridad, nan a sigui enfoca ariba otro asuntonan".  "Nos no ta bay elabora den e nombramento di Nos Gobernador, pero esaki a cautiva e atencion total di Gobierno sin cu tabata necesario" e grupo a finalisa bisando.