Di dos opendag di Corte di Husticia tabata exitoso

ORANJESTAD - E di dos opendag di Corte den su formato nobo tabata sigur exitoso. Presidente di Corte na Aruba Peter Lemaire a splica NoticiaCla.com cu e tabata sumamente contento cu e desaroyo di e dia. "Hopi hende presente, tabatin presentacion den e sala over di ley di famia, pa cual tabatin hopi interes, presentacion di K9 di KPA, y tabatin tambe un caso penal unda cu e publico mes por a dicidi e castigo" Lemaire a splica. 

Lemaire tabata contento cu e cantidad grandi di persona cu a bin diasabra riba nan dia liber. Interesante tabata cu mayoria tabata un publico local, unda cu a te hasta duna presentacion na papiamento y tambe den hulandes. Hopi pregunta haci durante e casonan cu a satisface Lemaire tambe. Inicialmente tabatin duda cu e ora lo tabata mucho hopi pa trata e caso di ley di famia, pero tabatin hopi interes y hopi pregunta. "Esey mi a haya bon, y esey tabata e meta tambe". Pa loke ta e dia mes, e intencion tabata pa tur hende tin acceso casi tur caminda. "En principio tur hende por a bay tur caminda. No tabatin casonan normal, no tabatin detenidonan cera den e lugar, pues tur hende por a mira tur cos. Pero tin suficiente camera y personal di seguridad pa tira bista riba tur cos. E orario di e opendag tabata di 9'or di mainta pa 1'or di merdia.