Bermudez: Presupuesto 2015 no ta cla prome cu 1 September

ORANJESTAD - Presupuesto 2015 lo no keda cla pa wordo entrega pa dia 1 di September. De hecho, mester warda te ora cu e presupuesto 2014 keda cla pa por finalisa 2015. Minister di Finanza Angel Bermudez a confirma esey na Noticiacla.com diamars atardi laat. Mientrastanto reunionnan ta continua pa finalisa esaki toch den concepto pa entrega esaki na Raad van Advies. “Pa motibo cu presupuesto 2014 no ta formalisa, mi no por finalisa 2015” Bermudez a bisa. Esey kier men cu si 2014 no bin cla prome cu September 1, bo no por keda cla. “Pero lo no dura mucho mas cu esey”.

Bermudez sigui splica cu e tin cu tene cuenta cu posibel remarkenan cu por bin ora cu CFT keda cla cu su recomendacionnan pa presupuesto 2014. “Ta prudente pa mi inclui (e cambionan) mas tanto posibel caba (den 2015). Pesey mi tin cu warda e presupuesto di 2015 un rato te ora cu 2014 ta aproba “Bermudez a sigui bisa.

Di tur forma, si e presupuesto 2015 tabata cla caba awe, lo mester a mande pa Raad van Advies cu (manera cu Noticiacla.com a raporta caba) lo tin cu tuma su tempo pa analisa esaki. A compronde cu esaki lo tuma por lo menos 3 pa 4 siman di tempo. Y mirando cu aki dos siman caba ta 1 di September, e ta bira un tarea imposibel sin mas. “Y ami no kier pone presion riba Raad van Advies” Bermudez ta sigui bisa.