DPS: A conduci investigacion relaciona cu keho contra juffrouw di scol

ORANJESTAD - Manera mayor di e alumno di Reina Beatrix School a menciona, ela cana e caminda corecto pa locual a pasa cu su yiu. Dienst Publieke Scholen (DPS) ta encurasha tur mayor cu tin keho riba e forma con docentenan ta sea trata cu e alumnonan of e calidad di les cu ta duna den klas, pa pone DPS na altura. Meta ta pa haci tur lo posibel pa salvaguardia interes di e alumno.

Den e caso specifico aki, e mayor a entrega un keho y DPS a atende e keho conforme procedura. Manera den tur caso di keho, a duna e juffrouw "toegangsontzegging" pa 6 siman cu e meta pa haci un investigacion separada dor di DPS y Inspeccion di Enseñansa. 

DPS a sigui e consehonan di Inspeccion di Ensenansa y a papia cu e mayor.  Lo no duna informacion specifico pa proteha e mucha mas hopi posibel. Ta di lamenta cu informacion specifico ta sali den prensa mirando cu esaki ta trece cu ne mas atencion negativo riba e mucha. 

Na tres ocacion mayor a pidi pa cambia su yiu di klas. A tene cuenta cu e deseo di mayor, pero siman pasa diamars e mayor ta pidi pa e yiu keda den e mesun klas. Y despues diabierna siman pasa e mayor a cambia di idea atrobe y a pidi pa su yiu cambia di klas. 

Ta bon pa enfatisa cu diabierna siman pasa, contrario na locual e mayor ta bisa den prensa, scol no a papia cu e alumno dilanti 4 adulto, pasobra den situacionnan asina no ta papia cu e alumno concerni sin presencia di su mayornan.  Dialuna dia 17 di october 2016 mayor a bolbe pidi pa cambio di scol. DPS ta enfatisa cu ningun momento Minister di Enseñansa a bisa cu juffrouw ta bai bek den klas y cu yiu di senora S. ta cambia di klas. DPS como directiva di scol ta atendiendo e caso aki. 

E alumno concerni desde e momento cu e keho a drenta ta ricibiendo guia di trahador social di scol. E klas ta hayando diferente lezing di e.o. Telefon pa Hubentud riba e tema “bullying”. E maestro lo haya guia di "Teacherscare”. E cabesante y zorgteam di scol ta bou guia di DPS. DPS ta subraya cu bienestar di e alumno concerni y tur otro alumno ta na prome luga.