Presidente di Parlamento a reuni cu sra. Koolman

ORANJESTAD - Presidente di Parlamento Mervin Wyatt Ras a tuma nota di declaracion den medio di comunicacion unda cu ta trece padilanti cu un grupo di famia a bin entre otro Parlamento pa entrega un carta y remarka cu “ni sikiera tabatin e decencia di ricibi e manifestantenan”. Segun Wyatt Ras, politico Evelyn Wever Croes a remarca riba ademas su wall: “presidente di Parlamento ni vice-presidente a atende Maritza Koolman y su famia cu a bin Parlamento awe”. 

Pa kita tur duda Wyatt Ras kier duna pueblo di conoce cu na ningun momento ningun persona a pone Parlamento na haltura cu lo bin un grupo di manifestantenan y cu no tabata necesario pa sra. Wever-Croes a ricibi documento di demostrantenan. Segun Wyatt Ras, Parlamento tin su procedura, describi den nos constitucion articulo III.12 inciso 2 y nos reglamento di ordo articulo 8. No ta keda na un parlamentario pa dicidi ken ta tuma kico fo'i demostrantenan, sino ta na griffie y presidencia pa regla esaki. 

No ta “zomaar” un politico por bin tuma carta den nomber di Parlamento. Wyatt-Ras, como presidente di e comision di Salud, a yega di tuma documento for di un grupo di manifestantenan ,pero esaki despues cu ela ser yama dor di griffie di parlamento. 

Den e caso aki segun Wyatt Ras, ta obvio cu sra. Evelyn Wever Croes kier haci politikeria cu e famia aki. Paso na ningun momento e parlamentario aki no a yama presidente ni vice-presidente ni a chek cu Griffier. 

Wyatt-Ras ta lamenta e proceder aki y ta pidi disculpa na e famianan pa e wega politico di e parlamentario aki. Esaki no ta e forma cu Parlamento como instituto ta anda cu cuidadanonan. 

Wyatt-Ras a tuma contacto cu representante di e famia en cuestion pa skucha e sra. Wyatt-Ras ta di opinion cu nos mester anda na un forma respetuoso cu nos ciudadanonan. Mas ainda despues di tuma  nota cu e politico Wever Croes en cuestion despues di tuma e carta ta “verwijt” cu presidencia no tabatey. A base di esaki por saka afor cu ta pesey e no a notifica presidente di presencia di demostrantenan pa e mes por tuma e carta. Los di esaki Wyatt-Ras ta trese padilanti cu recientemente den su funcion como presidente di e comision di Salud, Wyatt-Ras hunto cu e comision, a haci un sondeo ariba tereno di Salud y a papia cu stakeholders tocante salubridad. Ta fresco den memoria di Wyatt-Ras tambe cu ora mester a aproba e relato den e  comision a conta cu ausencia di henter oposicion, incluyendo Wever-Croes. Segun e presidente, ta jammer paso eynan e parlamentario aki por a pone den e relato critico cu a ser dirigi na minister di Salud kico ta su opinion y kico e kier mira como cambio den bienestar di e patient, pero ey el a keda ausente. P'esey mes para pafo y critica ta mas facil pa Wever-Croes cu duna un contribucion constructivo. Wyatt-Ras ta finalisa deseando e famia en cuestion hopi forsa pa sigui padilanti.