Schwengle: Lo entrega keho contra 'Hospital Engativá de la 80'

ORANJESTAD - Gobierno di Aruba lo entrega keho contra 'Hospital Engativá de la 80'. Diamars mainta minister di salud  Dr. Alex Schwengle a atende e caso di Sr. Minguel Koolman kende a fayece na Bogota. Esaki sigur ta un tema hopi delicado y pa e motibo aki Schwengle a duna un splicacion amplio riba e procedura y ayudo cu a ser brinda na e famia.

Debi cu e caso aki a bira uno publico e mandatario a dicidi di bin dilanti y trece su declaracion. El a bisa cu ta trata di un caso lamentabel "y ta duel mi hopi loke e famia a pasa aden y kere mi no tabata un trayectoria bunita pa e famia". Minister Schwengle tabata na altura di e caso pasobra e persona tabata su pashent prome cu el a tuma su posicion como Minister y su yiu di criansa ta traha cu ne, ela indica.

Ta bon pa subraya segun e mandatario,cu e declaracion cu un miembro di famia a duna tabatin partinan cu no ta berdad, minister a splica. Schwengle a laga sa cu e persona aki tabatin un enfermedad cu lastimamente no tin cura. A zorg pa e persona haya diferente opinion ora cu ela cuminsa su trayectoria como pashent cerca Dr. Schwengle. Su di dos opinion tabata cerca e suplente di Schwengle. Despues a bin un profesor di Hulanda y a yega na e mesun conclusion. A bay Hulanda y e conclusion tabata e mesun: cu ta trata di un enfermedad cu no por cura, pasobra e ta comparabel cu un cancer terminal, Schwengle a expresa.

El a sigui bisa cu ta comprondibel cu e persona aki a dicidi di bay Colombia pa un otro opinion y wak si acaso tin algo tog cu por a haci p'e pa su salud. Den opinion di e mandatario, locual a sosode tabata riesgoso ya cu su pulmonnan tabata asina malo pa bay biaha. Tog nan a biaha y ela bira malo. A keda pega na Bogota y di eynan suppose cu mester a bay Cali. Ela drenta "Intensive Care" y ela fayece.

Schwengle a agrega cu e famia a acerca AZV. Na momento cu AZV manda un hende afo pa un trato medico, segundo opinion of cualkier motibo, AZV ta carg'e y pag'e. "Si bo fayece den exterior, bou guia di AZV, nan ta zorg pa bo bin bek".

E mandatario a aclaria cu "Na momento cu bo bay riba bo mes y si bo ta malo, cu un enfermedad hopi severo, bo ta core hopi riesgo y ta nifica cu bo mester prepara hopi bon. Bo mester zorg pa bo tin un bon seguro". Schwengle a subraya cu seguro no mester discrimina maske bo tin un enfermedad cronico. Lesa e papel di clausula di e seguro hopi bon prome cu firma tambe.

E mandatario a splica cu den e caso aki a tuma hopi riesgo, a bay busca un di 5 opinion na Colombia, cu tur comprension, e persona a bira malo y a bin fayece. A subraya cu banda di esaki lo entrega un keho contra e Hospital Engativá de la 80 na Bogota. Via embahada y Gobierno di Colombia lo entrega un keho contra e hospital.

Como minister di salud, ela splica, cu e ley di AZV ta prohibi'e di haci uzo di e ley di AZV pa casonan asina. A busca manera pa yuda e famia y na final a haya sa cu via Sociale Zaken por a regla e asunto. Tur e tempo a tuma contacto cu Dienst Buitenlandse Betrekkingen, embahada y Gobierno Colombiano y nan a duna ayudo.

"Mi ta compronde y mi ta lamenta pero esey no ta duna ningun hende derecho di gaña asina. Si bo no ta contento cu e proceso, mi ta compronde esey. Mi ta admiti, e proceso a dura hopi te na e momento cu nos a yega na e solucion pa yuda e famia", e mandatario a expresa. E berdad ta cu si bo bay via AZV tur cos ta regla pero ora bo bay riba bo mes, ta masha poco cu Gobierno por haci.