Alfonso Boekhoudt mes ta bira Gobernador di Aruba

DEN HAAG - Alfonso Boekhoudt mes ta bira e proximo Gobernador di Aruba. Asina minister president Mike Eman y minister Hulandes Ronald Plasterk a dicidi. E mandatarionan a topa diamars na Den Haag pa papia riba e nombracion. A conclui cu e nombracion no tabata di e forma mas elegante y cu Plasterk ta acepta esey. Pero awor cu e nombracion ta ancra den un decreto real, gobierno di Aruba lo acepta esaki den interes di e relacionan den Reino. Como tal Eman ta bolbe Aruba sin logra cambia e pensamento di Hulanda riba e tema aki. Den un declaracion conhunto, e dos mandatarionan a splica resultado di nan reunion. 

TRAHA HUNTO

Ambos minister a tuma pa nan mes pa den e proximo periodo intensiva e cooperacion riba otro tereno tambe y pa promove bentahanan mutuo.  

TONO DIFERENTE 

Den un tono diferente cu su carta cu el a manda pa Hulanda siman pasa, prome minister Mike Eman a splica di su 'mision' relampago pa Hulanda dialuna prome cu subi avion, manera cu NoticiaCla.com a raporta dialuna atardi. Mientras cu apenas algun dia pasa, el a papia di ''exigi pa Hulanda revoca  di  nombracion di (Alfonso) Boekhoudt como proximo Gobernador di Aruba', e ta papia awor di 'pone un base pa Reino Hulandes por sigui existi, pero si den un forma unda tin respet mutuo, unda tin obhetivonan comun na fabor di tur e paisnan den Reino'. Pues un cambio di tono, unda cu no ta papiando di exigi mas sino pa si tin respet mutuo.

DELEGACION

E mandatario a bay cu un delegacion consistiendo di tambe minister Benny Sevinger y secretaria di Conseho di Minister Nicole Hoevertsz  dialuna atardi. Esaki relaciona cu nombramento di e Gobernador nobo cu no a bay segun reglanan y palabracion haci. 

TONO 

Den su tono diferente, Eman ta papia awo di 'un situacion masha fastioso y tenso cu a pone hopi presion innecesario den Reino Hulandes'. Segun Eman, na e momentonan aki tin un situacion hopi serio. Ta trata aki di procesonan cu ta ancra dentro di decisionnan cu a wordo tuma den Conseho di Reino na 2001 con e procedura tin cu bay na momento di nombra un gobernador. Nos por papia aki di un situacion sumamente dificil pa Reino Hulandes. E decision cu a wordo tuma ta pone un peso hopi grandi riba e relacionnan actual".  Eman ta haya cu ta hopi importante pa hiba un bon deliberacion pa rescata e fundamentonan di Reino Hulandes. "Pa asina crea un perspectiva positivo pa continuacion di Reino. Nos ta sinti falta di un orientacion comun pa por haci cosnan positivo den Reino." Eman ta lamenta con cada bes ta tuma decisionnan cu ta trece un desekilibrio den e relacionnan. Eman a bisa di no kier bisa mucho mas cu esey den su declaracion di loke nan por logra den nan biahe pa Hulanda. 

BEK DIARANSON

Prome Minister Eman y su delegacion ta bek na Aruba diaranson, despues cu diamars ta sinta y delibera den forma serio cu Minister di Asuntonan di Reino Ronald Plasterk.