AZV: Sea responsabel ora bay exterior riba bo mes

ORANJESTAD - AZV a haya su mes forsa pa reacciona riba articulonan cu a sali den media tocante un persona cu a bay riba su mes Colombia pa cuido medico. Solamente ora un specialista medico ta manda un persona exterior pa cuido medico via AZV, tur asunto di biahe y tratamento ta wordo regla door di AZV. Si un hende mes kier bay cualkier pais ta su mesun decision y e mes tin cu organisele.

Den e caso aki AZV a manda e persona Hulanda pa un second opinion fin di aña pasa. Na Hulanda a resulta cu e dokternan no a wak opcion mas pa e pashent y ela bin bek Aruba. E biahe den avion tawata problemactico, aunke cu tawatin un acompanante medico dedica pa e pashent.

Bek na Aruba e famia a dicidi pa bay Colombia pa busca un 3th opinion. Aunke ta comprendibel cu e persona y su famia kier haci todo posibel pa cu su salud, ta irresponsabel pa biaha den avion mirando e problemanan cu a experiencia ora di bin bek for di Hulanda. Specialmente si ta biaha via Bogotá cu ta basta halto.

Tuma nota cu AZV no a divulga informacion.