Oduber: Ultimatum pa AHATA riba nomber pa hunta di ATA

ORANJESTAD - Minister di turismo Otmar Oduber a manda un carta pa AHATA dunando nan dos siman pa nomina representantenan cu falta pa hunta di ATA. Di otro forma lo tin cu bay corte pa medio di un hues, forza AHATA haci tal. Segun e mandatario a splica dialuna, no por ta asina cu minister su mannan ta keda mara pa lunanan largo pa motibo cu AHATA no por nomina miembronan nobo. "Un carta lo sali awe un bes mas pa AHATA y di mi parti esaki lo ta e ultimo mirando cu un serie a wordo manda incluso a papia cu diferente GM, pendiente contesta di AHATA pa por sinta na mesa na un forma oficial", segun minister encarga cu turismo Otmar Oduber a bisa.

MIEMBRONAN NOMINA

Mas trempan den e aña 3 miembro cu a wordo nomina y nombra door di Oduber a keda retira y no a duna motibo specifico pakico lo a retira nan. Mas leu ainda, segun e por compronde cu nan a hasta firma un documento e tempo ey cu no ta permiti ningun partido di nan banda pa papia riba e motibo cu a retira e 3 miembronan. Na diferente ocasion el a bisa cu e tempo ey el a considere mirando e campaña cu tabatin y cu ta respeta e posicion tuma pa AHATA y algun di su miembronan pa loke ta trata e interes personal cu ta wordo defendi e tempo ey. Pero ta yega un momento aworaki cu algun luna caba, cu ta un ley y cu naturalmente mi persona ta e persona responsabel conforme ley pa loke ta e maneho y totalidad cu mester existi den e hunta di supervision. "Mi ta sinti cu e ta bira poco iresponsabel pa conta cu un hunta  cu no ta carga su miembrecia den su totalidad" Oduber a finalisa bisando.

MIEMBRONAN INTERESA

Di otro banda no ta compronde e rason pa cual ainda no por nomina e nombernan, a compronde cu nan a bisa cu e ta dificil pa haya hendenan cu ta interesa. "Mi ta kere mas cu pa loke ta esey, un eror a wordo haci na momento cu ta mustra na profesionalnan cu e opinion cu bo ta drenta ATA cu ne no por ta basa riba un opinion profesional pero cu ta keda cu influencia di esun cu a nomina bo. E ley ta bisa bon cla cu unabes e wordo nomina, ta actua riba un forma profesional y no basa riba esunnan cu a nomina bo. A pidi un conseho huridico y lo evalua si no por yega na un forma transparente y cu den colaboracion pa nominacion di miembronan lo mester busca pa sa kico hues ta pensa di e forma di anda caminda cu no ta nomina e miembronan y ta laga e hunta si supervision manka. Mas importante ta laga e sector hotelero, hospitalidad di Aruba no ta presente den e hunta di comisario manera cu originalmente e ley ta menciona, minister Oduber a termina bisando.