Plasterk ta topa Eman diamars na Hulanda pa resolve impasse

ORANJESTAD / DEN HAAG - Prome minister di Aruba Mike Eman ta biahando pa Hulanda dialuna merdia pa reuni diamars cu minister Hulandes pa asuntonan di Reino Ronald Plasterk. For di Hulanda NoticiaCla.com a haya confirmacion dialuna mainta di e reunion aki. Segun e informacion oficial, 'tin un un procedura pa loke ta trata nombracion di un Gobernador. E procedura segun gobierno di Aruba, no a wordo aplica corectamente' ta loke e informacion oficial di Hulanda ta bisa dialuna den un comunicado. 

"Como tal minister Plasterk den su responsabilidad pa relacionan di Reino, a palabra cu prome minister Mike Eman, cu lo tene un combersacion cu otro riba e 'reclamo' di Aruba riba termino hopi corto. E reunion ey lo tuma lugar diamars na Den Haag" e comunicado ta finalisa bisando. No ta conoci si e combersacion ey por conduci den revocacion di e desicion di Hulanda pa nombra Alfonso Boekhoudt, of si lo por haya otro toch cu e nombracion ey. A compronde cu e siman aki tambe, tabata programa pa Rey Willem Alexander huramenta Boekhoudt den su funcion nobo. Foto archivo noticiacla.com