Wever-Croes ta urgi Eman pa stop cu e pleito infantil

STA CRUZ - Lider di partido MEP Evelyn Wever Croes ta considera e actuacion di prome minister Mike Eman como un pleito infantil y kier pa e stop cu esey y goberna e pais. Segun Wever, den fin di siman por a nota cu prome minister di Aruba Mike Eman a manda un carta brabo pa Hulanda pa reclama e forma con e nombramento di gobernador a bay. Hulanda a contesta cu tur cos a bay segun procedura di Statuut. 

BUSCANDO PROBLEMA

"Pa locual nos por a compronde ta cu Mike Eman mes a busca tur e problema aki. Na prome lugar ela tarda demasiado pa bin cu su mesun candidatonan. E tema aki ta uno serio y e mester a trat'e na forma serio tambe. Na di dos lugar, Mike Eman no a defende su candidato Angel Bermudez, manera Nel Oduber si  a defende su candidato tempo el'a propone sr Fredis Refunjol.  Na di tres lugar, henter Aruba tabata sa cu sr Alfonso Boekhoudt tabata e candidato di Hulanda, bo kier pretende cu Mike Eman so no tabata sa?" Wever ta sigui puntra. 

Segun e lider di e partido geel, nombramento di un gobernador ta motibo pa un pueblo uni pa yama e gobernador bon bini. Nunca antes nos a haya nos confronta cu algo asina. "Ta cu AVP so e cosnan aki ta pasa". 

"Mi ta urgi Mike Eman, stop cu busca confrontacion pa e casi aki, pasobra ta bo mes a caus'e.  Confrontacion no ta yuda cu nada, especialmente awor cu Rey a seya e nombramento cu e decreto real. Hulanda ta insisti cu nan a cana e procedura corecto. Y ta danki na e actitud complaciente cu AVP semper a aplica pa cu Hulanda, awe nos ta den e situacion aki. Pues ta bo mesun culpa." Wever ta finalisa bisando.