Tin hotelnan 15 aña bieu na Aruba sin bouw vergunning

ORANJESTAD – Pa straño cu por zona, tin hotelnan na Aruba cu ta existi pa 15 20 aña cu no tin un bouw vergunning y otronan cu tin construccionnan ilegal, sin cu e tereno mes ta di nan. Minister di Turismo Otmar Oduber mes a confirma esaki, pero no ta bisa cua hotel e ta referi na dje ni con esaki por a sosode. E declaracion aki ta bin den cuadro di e problemanan cu recientemente gerente general di Aruba Radisson Hotel , Mark Lyttleton Frances a trece dilanti den media. For di su declaracion, por saca afor cu esaki a practicamente habri un box di Pandora unda cu un cantidad di problema ta sali na superficie, manera e asunto di falta di bouwvergunning pa hotelnan.

Banda di esakinan tin otro problematica nan segun e mandatario, manera ta e caso cu varios hotel ta conta cu palapa full rond unda cu tin hasta palapa te yega te na awa y otronan cu ta huur palapa for di paden di e hotel mes. “Tur esaki riba beachnan cu ta publico una esaki no mag di sosode”, Minister Oduber a bisa. El a agrega cu a reuni igualmente cu tur e companianan di watersports cu ta un indicacion cu ta un trabou hopi grandi a wordo haci dor di DIP y Ministerionan di Infrastructura y Turismo. Durante e reunionnan aki a mustra tur participante riba e plannan cu tin, cambionan di ley y maneho cu ta bay tin y esakinan a wordo publica den medionan di comunicacion.

E cambionan aki no lo ta facil pasobra ta trata di companianan cu a opera pa 10 pa 15 aña riba beach sin cu a reglamenta esaki. Pesey Minister Otmar Oduber ta bisa cu no por ehecuta e cambionan di un dia pa otro, de lo contrario lo bay bin un cantidad di caso den corte. Pa tal motibo aña pasa a publica na 3 ocasion den medionan di comunicacion riba e cambio di maneho cu ta bay bin.