Hulanda ta para ariba cu nombracion ta conforme statuut

ORANJESTAD - "E nombracion (di Alfonso Boekhoudt como Gobernador di Aruba) a tuma lugar conforme Statuut". Asina representantenan di gobierno Hulandes a informa NoticiaCla.com den fin di siman como reaccion riba e carta cu premier Eman a manda pa colega Rutte siman pasa. Basa riba e carta, e portal aki a manda un serie di pregunta, pero no a haya mucho bek sino solamente e parti ariba. Manera nan ta bisa na Spaño, 'a buen entendedor, pocas palabras'. 

CARTA DI EMAN PA RUTTE

Manera ta conoci, siman pasa Eman a manda un carta pa su homologo den cual e ta protesta e nombracion unilateral y ta 'exigi pa e desicion ilegal aki wordo revoca y ta desea di papia cu e mandatario den un termino corto riba e tema aki'. E carta corto di 2 pagina ta repasa e hechosnan cuminsando cu e nombracion di di 7 di october ultimo, y ta bisa mesora caba cu e ta 'empugna cu e reglanan stipula entre paisnan di Reino pa loke ta nombraciono di un gobernador'. E ta añadi e documento acerca como referencia. Sinembargo, mester remarca cu mientras cu tin un protocol firma, e no a wordo ancra nunca den un ley, y posiblemente esey ta e 'upperhand' cu Hulanda tin aworaki, y cu ta e debilidad cu Aruba tin. Ademas, NoticiaCla.com a compronde cu Hulanda ta para riba cu ta dos candidato finalmente a ser considera y nan a scoge pa Alfonso Boekhoudt y proceso aki a bay segun Statuut. Ademas Promer Ministro Eman tabata sa di e dos opcionan aki tambe, nada a bay scondi segun Hulanda. 

TOPICO DI DISCUSION

Den fin di siman e tema a keda un topico di discusion y tur caminda por a tende esaki wordo papia. Mayoria di persona ta pensa cu Boekhoudt ta e candidato perfecto pa e funcion, y tin tur e cualidad cu esaki mester. Hopi tambe ta pensa cu e loke cu gobierno ta haciendo, ta un acto cu e persona nombra awor no merece. Di otro banda, den seno di gobierno, ta reina un rabia grandi pa e persona aki y e loke el a haci (acepta e posicion), unda cu palabranan di traidor di patria, golos pa posicion y mas ta core rond. Hecho ta cu e ta un situacion no sano y cu a pone Aruba y Hulanda liña recta contra otro. Mientrastanto for di e propio persona no tin mucho cos ta saliendo. 

CON POR BRINGA ESAKI 

E posibilidad pa Aruba ta den discusion aworaki tambe. Historia tin como hurisprudencia, cu un situacion aki a sosode caba, pues no ta nada nobo. Tabata den añanan 70 ora cu Hulanda mescos cu awor, a nombra un persona (Efraim Jonkheer) como gobernador, contra gusto di Antias e tempo ey. Pa medio di un asina yama 'intern appèl, a revoca e decreto real y a bin nombra Ben Leito como Gobernador e tempo ey. Den gangnan di gobierno di Aruba, ta coriendo e pensamento pa haci mescos, aunke no por garantisa cu e situacion aki lo por ta mescos y cu esaki por resulta na fabor di Aruba. NoticiaCla.com a compronde cu hasta Raad van State a 'toets' e asunto aki y no a haya nada malo cu ne. Y Rey Willem Alexander siman pasa a firma e decreto caba, y ta papia cu otro siman caba e huramentacion por tuma lugar.