Eman: Aruba ta exigi Hulanda revoca nombracion Gobernador Aruba

ORANJESTAD - Gobierno di Aruba ta exigi di gobierno Hulandes pa revoca e desicion tuma (di nombra un gobernador cu no ta conta cu sosten di Aruba). Prome minister di Aruba Mike Eman siman pasa a manda un carta fuerte pa su homologo, informando e di su malcontento ( na nomber di su gobierno) y ta mustra gobierno Hulandes riba tur e malo cu a wordo haci. 

EXIGI REVOCACION

"Mi ta informabo cu e nombracion di Gobernador di dia 7 di october ta contra e reglanan stipula pa conseho di minister di Reino pa nombracion di gobierno" Eman ta cuminsa na bisa. Aki e ta relata e forma con esaki 'mester a bay'. Pero e forma con cos a bay, segun Eman ta bisa, no ta corecto. "Conseho di minister a bisa for di comienso cu nan ta postula (Angel) Bermudez como candidato y cu e persona aki tambe a wordo invita pa un combersacion cu minister pa asuntonan di Reino, Ronald Plasterk. 

DESICION ILEGAL

Ademas Eman ta subraya den su carta, cu 'conseho di minister no por haya su mes den e proceso tuma pa nombra Boekhoudt como Gobernador di Aruba'. Y finalmente e ta bisa cu 'conseho di minister di Aruba ta exigi por lo tanto, cu e desicion ilegal tuma, ta wordo revoca y kier discuti riba e tema a termino corto'. E carta a wordo manda pa Rutte fecha 12 di october ultimo.