Gobierno a termina su confiansa cu Alfonso Boekhoudt

ORANJESTAD - Fuentenan den gobierno a confirma pa NoticiaCla.com diabierna atardi cu a kibra relacion y confiansa cu minister plenipotenciario Alfonso Boekhoudt. Esaki por nifica defacto cu e la haya su retiro di su funcion. NoticiaCla.com a compronde cu Boekhoudt a ricibi su carta diabierna, indicando cu su retiro ta vigente entrante 1 di november 2016. Manera ta conoci, Boekhoudt a keda apunta pa RMR pa bira e proximo Gobernador di pais Aruba. For di e momento ey, cos no a bay bon entre Gabinete Mike Eman II y su persona, ya cu gabinete ta sinti cu Boekhoudt lo no a tene su mes na palabracion haci, cu e no ta acepta e posicion di Gobernador. Informacion cu NoticiaCla.com ta dispone di dje ta mustra sinembargo cu cos a bay otro. Y despues di un siman cu no tabatin ningun informacion riba e tema for di seno di gobierno, e rumor a cuminsa circula diripiente diabierna cu durante conseho di minister diabierna a tuma e desicion pa kibra e relacion cu minister plenipotenciario. NoticiaCla.com a compronde tambe cu e persona en cuestion mes oficialmente a wordo notifica di e informacion aki pa medio di un carta y un landsbesluit. Keda pendiente pa mas informacion.