Parke Nacional Arikok tin general manager nobo

ORANJESTAD - Hunta di Directiva di Fundacion Parke Nacional Arikok ta anuncia cu a firma contract cu Natasha Joelle Silva pa e funccion di manager general di Parke Nacional Arikok. Dia 1 di november 2016 Natasha lo asumi e puesto y responsabilidad di dirigi Parke Nacional Arikok. Cu esaki Hunta di Directiva ta kere cu lo drenta un era di stabilidad nobo na nos parke nacional. Natasha ta un persona cu tin curazon pa Aruba y pa naturalesa y a traha pa diferente organisashon cu ta salvaguardia interes di naturalesa y cu ta informa communidad encuanto e importancia di naturalesa pa communidad humano.

Hunta di Directiva ta sumamente contento y orguyoso pa presenta Natasha pa medio di e communicado aki na communidad di Aruba. Aki ta sigui un relato chikito di Natasha Silva.

Natasha ta bin di un famia cu ta stima naturalesa y durante su niñes e tabata pasa tur su tempo den naturalesa.  Asina aki a nace su pasión pa bestia y naturalesa, después pa ecología y conservación di naturalesa.  

P’esey su pasión no solamente ta haña nan bek den su estudio pero tambe den su trabow.  Den pasado Natasha a eherce varios funcion den maneho y directiva  di entre otro “Artis Amsterdam Zoo”, “International Zoo Educators Association(IZE)”, Instituut voor natuurreducatie en duurzaamheid(IVN)” y “Vogelpark Avifauna”.  Ademas e la traha varios aña den directiva di educacion innovativo.

Den e funcionnan aki Natasha a duna guía na profesional y tambe voluntario, y e tabata traha como “project manager” riba diferente nivel cu teamnan multidisciplinario y e tabata responsabel pa trayectonan di cambio complica.

Ademas e tin amplio experiencia cu construi y mantene rednan y comercio.  Pa tur función cu Natasha a eherce e ta pone tur su alma y curason  den dje, no teniendo cuenta cu naturalesa so, sino tambe pa e ser humano cu e ta traha cu ne.

Natasha ta naci na Aruba unda ela biba te cu su 8 aña. Durante su temporada di scol e a biba prome na Bahamas, y después na Inglatera.  Después e a sigui su educacion avansa na Hulanda.  Ora di termina tres estudio, e por yama su mes, antropologo cultural, museologo y docente di biologia cu specialisacion den durabilidad, ecologia y desaroyo.

Durante su temporada como studiante e a topa cu su casa economista Remco Liem.  Hunto nan tin un yiu homber y un yiu muher den edad di scol basico.

Famia Liem-Silva ta stima naturalesa y descubri mundo.  Hunto nan ta pasa varios vacacion activo den naturalesa na varios continente. Nan tabata bishita famia y amistadnan na Aruba y naturalmente Parke Nacional Arikok!