Gobierno lo soluciona problemanan riba beach cu ‘beach policy’

ORANJESTAD - E siman aki conseho di minister lo aproba un asina yama ‘Beach policy’, cu a keda traha riba orden di e ministernan di turismo y medio ambiente. Cu esaki e mandatario di turismo ta reacciona riba e keho emiti menos cu un siman pasa di gerente di Radisson Hotel Mark Lyttleton Frances. Lyttleton a mustra siman pasa cu e problema di e.o. droga riba beach y problema di palapa ta coriendo cu su huespednan di hotel. Mientras cu segun gobierno ta bisa cu esaki tin su atencion y mes momento ta admiti cu e problema menciona ta algo cu a bin ta creciendo sigur e ultimo 10 añanan mirando e cantidad di actividadnan cu ta tuma lugar na beach y areanan di hotelnan.

Según Oduber, strandpolitie a actua repetidamente den e caso aki manera gara hende bendiendo droga, molester di OPC y problema cu palapa. Mes momento el a mustra cu enberdad e servicio di palapa hopi biaha ta conduci na problemanan entre esnan cu ta traha na e hotel y/of companianan di watersports y e clientenan y comportacion di esnan cu ta maneha e deportenan acuatico.

Loke cu ta resulta awor ta cu pa e ultimo 2 añanan un comision a traha ‘tras di cortina’ riba un asina yama ‘beach policy’, y a haci esaki riba orden di minister di turismo y esun di infrastructura. Den e cuadro aki e minister a bisa cu a bin ta trahando pa basta tempo caba riba e ‘Beach Policy’. Durante e ultimo 2 aña y mey tin un comision trahando bou encargo di Minister di Infrastructura y Minister di Turismo cual a reuni cu tur hotel cu tin riba strip di nos beachnan.

“Awor cu tur e rapportnan ta cla, cu a reuni cu tur hotel, cu tur compania di watersport, cu tur hende ta na altura di e cambionan cu ta bai bin, e siman aki den Conseho di Minister ta bai aproba e plan cu tin riba mesa cual a wordo discuti cu casi 80 diferente partnernan”, e titular di Turismo a duna di conoce y a agrega cu asina e wordo aproba por pasa over na su ehecucion. E plan aki lo regula en parti e ‘desorden’ cu tin na e momentonan aki riba nos beachnan hunto cu e proyecto di camaranan di seguridad cu Minister di Husticia lo ta introduciendo via FDA.

E esfuerzonan aki mester inclui participacion di sector priva tambe, Minister Oduber ta indica, pasobra hotelnan tambe tin un responsabilidad pa carga gastonan di por ehempel di camaranan y security cu mester tin den area di hotelnan. “Asina nos por yega na un plan conhunto pa por combati e fenomenonan cu mi a menciona cu ta tuma lugar muy particularmente den e area di beachnan y tambe dilanti di e resortnan na e hotel area”, Minister Otmar Oduber a finaliza bisando.