Travel Guide Book "Dominicus" di bishita na Aruba

Oranjestad - Recientemente Aruba Tourism Authority a invita prensa di Hulanda pa conoce y promove nos bunita isla. E director di e revista Dominicus Travel Guide Book, Sr. Guido Derksen y e fotografo, Sra. Rene Kwak a bin pa traha un reportahe di nos destinacion. Dominicus Travel Guide Book ta un buki cu ta worde promove na Hulanda y Belgica. Den e buki por haya tur informacion di Aruba, Curaçao y Bonaire.

Ademas nan a haya oportunidad pa conoce mas di nos isla y tambe pa nota e actividad nobo cu Aruba ta ofrece na su bishitantenan. Nan a cera conoci cu e Sunset sailing cu De Palm Tours y tambe snorkeling cu Jolly Pirates. Ademas, nan por a disfruta di un recorido di nos isla cu ABC Tours, durante cual nan a saca hopi potret. Pa termina nan a experiencia un desayuno den nos Parke Nacional Arikok hunto cu Sr. Julio Beaujon. E programa pa e prensa a wordo coordina pa Sra. Jasmine Maduro, representante di Aruba Tourism Authority.

Alabes, Aruba Tourism Authority kier a gradici tur esnan cu di un of otro manera a coopera pa realisa e programa aki, cu ta Papiamento Restaurant, Old Fisherman, Bucuti, Agua Grill Restaurant, Moomba Beach, Westdeck Restaurant, Papillon, Hadicurari Restaurant, Big Mama Restaurant y specialmente Boardwalk Appartment unda cu nan a hospeda durante nan estadia na Aruba. Riba e potret por mira mas con e grupo di prensa a encanta nos isla.