Deal pa trahadonan ex Aura Casino colga na un hilo

ORANJESTAD - Sindicato FTA tin tur speransa cu e caso cu nan a entama contra e compania Island Gaming, lo trece claridad den e asunto di e trahadonan di ex Aura Casino. Mientrastanto, fuentenan cerca na e proceso, ta informa NoticiaCla.com cu e 'deal' pa e 25 trahadonan ta 'colga na un hilo'. Esey pasobra e caso por resulta den e 'dealbreaker'. E intencion di FTA tabata pa hiba tanto TMRG Group (e grupo anterior) y Island Gaming (esun nobo) corte, pero TMRG mientrastanto a bati bancarota recientemente. E caso awor ta pa FTA logra pa huez forza Island Gaming tuma e trahadonan di e casino over, cu tur e 'lusten en lasten'. Algo cu e grupo nobo lo no kier haci. 

OFERTA DI ISLAND GAMING

Segun presidente di FTA  Hubert Dirkz, e oferta cu nan a ricibi di Island Gaming ta uno 'minimal', cu e trahadonan a rechasa. "E compania no kier reconoce e derechonan di e trahadornan" Dirksz a bisa. Mientras cu Dirksz no por a bay den detayes di e oferta, a mustra cu e compania lo duna 2 luna di salario y lo tuma 25 trahado solamente y lo kita tur responsabilidad y debe cu e compania lo mester tuma segun ley. E sindicato ta haya cu ta incorecto di parti di ISland Gaming cu no a sinta na mesa cu e sindicato formalmente pa yega na un acuerdo. "Esey ta haci e situacion un poco dificil" Dirksz a bisa. E ta compronde si cu ora cu bo ta un compania nobo, bo no no a haci niun ganashi ainda y bo tin un debe asina grandi caba pa cuminsa cune. "Nos mester reconoce cu tin un ley y un derecho di trahadonan" e lider sindical a sigui bisa. 

NO A COMUNICA CU ISLAND GAMING

Segun Dirksz, unabez cu a bay corte, no tabatin mas comunicacion cu e compania. "Tur e contacto a kibra. Awor nos no tin contacto cu Island Gaming. Pero e siman aki cu a pasa nos a haya un carta di Island Gaming cu ta mustra cu nan ta haya cu nos mester a reacciona riba un proposicion di nan y cu nos mester a informa e trahadonan. Algo cu nos a haci" Dirksz a sigura NoticiaCla.com. E siman aki -segun declaracion di e lider sindical-, e compania lo a yama e 25 trahadonan. "No a tuma na serio e posicion cu e sindicato a tuma" Dirksz a bisa, pero no a bisa kico exactamente e ta referi na dje. "Nos ta sperando riba sentencia di dia 18 y eynan nos ta spera cu nos por bay mesa y yega na mesa pa por lo menos e 25 haya trabou y e otronan haya nan placa tambe" Dirksz a bisa. 

MALA FE DI SINDICATO

E portal aki tin informacion cu ta mustra cu e idea di e sindicato pa bay corte siendo cu ta den negosacion, e compania por considera como mala fe, y cu por pone cu e compania por 'hala atras'. "Si e compania dicidi di hala atras, cu ta un posibilidad, e casino ta keda cera. E ora si gobierno mester hala e licensia aden pa cera e casino definitivamente. E trahadonan ta keda perdi tambe" Dirksz ta acepta.