Tin mas tras di retiro miembronan di directiva AHATA

ORANJESTAD - E hecho cu dos miembro grandi di e gremio hotelero AHATA (Aruba Hotel & Tourism Association) a bandona e directiva, tin su motibo. Y manera cu NoticiaCla.com a compronde, e no ta manera cu e CEO di AHATA a declara na e portal Masnoticia -esta pa motibo cu nan tin demasiado trabou-, sino mas pa asuntonan interno cu nan no ta di acuerdo cune. Ta trata aki di e gerente di hotelnan Holiday Inn y Hilton. Mientras cu ambos gerente a retira di e directiva, e cadena Holiday Inn lo keda contribui na e fondo si. NoticiaCla.com a compronde cu Hilton sinembargo si ta stop su contribucion na e fondo. For di seno di gobierno, NoticiaCla.com a compronde cu esaki ta 'apenas e prome dosnan'. Y cu 'tin mas na caminda cu ta bay'. Pues e situacion ta uno interesante. 

HOLIDAY INN

E columnista hotelero popular cu tin su bon fuentenan cu no ta faya, Bati Bleki, ta relata varios motibo. NoticiaCla.com a bay averigua riba su mes y nan ta concorda cu otro, esta e motibonan señala. Entre nan, cu un di e problemanan di Holiday Inn ta cu nan lo kier a converti e hotel den un All Inclusive, pero e ley nobo di AI ta stroba nan di haci tal. Como tal nan ta 'desapunta' cu AHATA y nan ta sinti cu e gremio no a logra 'proteha' nan interes. 

HILTON

Retiro di e gerente di Hilton tin su motibo tambe. For di informacion acumula, e motibo ta diferente cu esun di Holiday Inn. Nan gerente (Hilton) a retira for di 19 di september, y un di e motibonan menciona, ta cu nan no ta contento cu e 'polarisacion entre gobierno y AHATA'. NoticiaCla.com a bay averigua y esaki enberdad ta un di e motibonan. Fuentenan den e cadena hotelero, ta mustra cu Hilton ta sinti cu polarisacion no ta yuda produci resultado pa e sector hotelero. Entre nan, e cambionan di ley laboral lo ta para, riba lessenaar di minister di Labor y asina tin mas asunto. Ademas, AHATA lo no ta sirbiendo interes di tur miembronan sino un grupito. "Como un gremio democrativo, e mester sirbi tur miembro di mesun forma".

MAS RETIRO NA CAMINDA

E portal aki a compronde cu tin mas retiro na caminda di mas miembro, y cu e retiro di e dos menciona, ta djies e comienso. Ta corda e asunto di retiro 'en bloc' di varios miembro di AHATA for di e directiva di Aruba Tourism Authority algun luna pasa, cu a sosode pa motibo di malcontento cu e.o. gobierno su maneho pa cu ATA. Mientrastanto cos a bira di cierto forma unda cu a logra reemplaza solamente un di e miembronan retira. No ta conoci pakico e otro miembronan di e  directiva completo no a wordo reemplasa ainda.