Cuerpo di bombero cu 'open dag' y 'brandweer loop'

ORANJESTAD - Cuerpo di Bombero y Rescate Nacional ta organisa su "Open Dag" y ya caba esaki a bira un dia masha gusta pa henter famia. E lo tuma luga diadomingo awo 16 di October na e Post di Brandweer na Tanki Flip cuminsando for di 10'or di mainta te 5'or di atardi.

KICO TUR TIN

Ferdinand Ponson, Officier na Cuerpo di Bombero Aruba a duna di conoce cu e dia aki ta bay tin water splash corner pa e mucha nan goza di e dia, lo tin display di e trucknan bombero mientras cu banda di esaki ta bay tin cortamento di auto unda lo splica kico tur ta loke e bomberonan ta haci ora cu tin un accidente cu hende pega aden.

PREPARACION PA DEMONSTRACION    

Segun Ponson, henter siman e bomberonan ta bezig preparando nan demostracion y e parti di e carera pa muchanan cu lo tin pe mucha nan sinto nan mes mane un bombero pa in dia. Ambulans tambe lo tey. Pa e dia aki Brandweer ta purba pone enfasis riba e muchanan. E muchanan ta haci hopi pregunta riba kico Brandweer ta haci, kico ta e ekiponan cu ta wordo usa, entre otro.

BRANDWEERLOOP

Den cuadro di e Open Dag tambe lo tuma luga parti mainta e asina yama "Brandweer Loop" di 10 km Run/Walk y 5 Km Fun/Walk. Esaki lo cuminsa na e Post di Brandweer Tanki Flip desde 6:00am te cu 9:00am. Esaki ta e careda clasico cu Cuerpo di Bombero ta organisa tur aña. Bo por inscribi ainda na IBISA. Diadomingo 5:00am lo cuminsa cu registracion y 6:00am e careda lo inicia, Ferdinand Ponson a indica.