Centenares di ciudadano a marcha contra criminalidad

ORANJESTAD - Centenares di persona a marcha diahuebs atardi contra criminalidad den cayanan di Oranjestad. Cifranan oficial no tabata disponibel pero ultimo conteo a pone e cifra na entre 700 pa 1000 persona pa ora cu e marcha a yega Bestuurskantoor. Prome cu esey, e marcha a inicia cu mas of menos 200, crece pa 500 y pa ora cu el a pasa dilanti warda di polis, esaki a yega riba 700 persona. Varios tabata e pancartanan cu tabata desplega tur sorto di protesta, variando di criminalidad, abuso di mucha, y hasta e caso di baby Lunah tabata presente. Esaki tabata un di e marchanan mas grandi cu a keda organisa, y cu a hala mas hopi hende diverso posibel. Na final di e marcha, e rutina a bolbe, unda cu e lidernan di e marcha, a entrega un manifiesto na prome minister Mike Eman y colega di husticia Arthur Dowers, acompaña pa minister Paul Croes. A sigui e acostumbrado intercambio di palabra, pa despues un comision di 3 subi pa combersa cu e mandatarionan presente. E marcha tabata completamente pacifico y alto comisario Dolfi Richardson a mustra NoticiaCla.com cu e tabata satisfecho cu e desenlace di e marcha. Na final di e combersacion entre e delegacion y gobierno, gobierno de facto a firma un compromiso mesora, cu organisadornan ta considera un 'first'. Den e compromiso firma, ta para e.o. cu 'Gobierno ta cera un compromiso cu pueblo ariba e siguiente puntonan como accion inmediato, cu lo wordo anuncia den rueda di prensa mañan mainta. A surgi 3 punto clave, unda cu ta mustra cu ''gobierno di Aruba ta declara di manera inmediato siguridad como prioridad y un maneho di zero (0) tolerancia contra criminalidad y ilegalidad. 2. Gobierno di Aruba ta compromete su mes pa aumenta presupuesto 2017 pa combati criminalidad cu 10 miyon adicional. 3. Gobierno di Aruba ta priminti cu cuerpo policial lo wordo reforsa pa asina comunidad por conta cu mas polis riba caya. E documento aki a wordo firma pa prome minister Mike Eman.