Anochi di informacion pa studiantenan interesa pa studia na Merca y Canada

ORANJESTAD - Diamars dia 25 di october proximo Ministerio di Enseñansa conhuntamente cu Departamento di Enseñansa lo tene un anochi di informacion pa tur studiante cu tin e interes pa bay studia na Merca of Canada. E anochi di informacion lo tuma luga na e Auditorium di EPI y lo cuminsa pa 7:00 or di anochi. 

Durante di e anochi di informacion lo duna informacion general riba studia na Merca y Canada, lo duna informacion di financiamento di estudio (Arubalening) pa por studia na e paisnan aki y tambe lo enfoca riba e estadonan y universidadnan na e paisnan menciona cu cual pais Aruba tin un areglo special pa nos studiantenan Arubiano. Ta trata aki di entre otro e estado di South Carolina cu ta inclui University of South Carolina (USC) y Coastal Carolina University, Seneca College na Toronto Canada, St Mary’s College na Maryland y otronan cu ta den proceso pa wordo formalisa. E anochi aki lo conta cu presencia di representantenan di University of South Carolina cu lo ta na Aruba pa duna informacion. Departamento di Enseñansa afdeling studiefaciliteiten y Aruba Scholarship Foundation tambe lo ta presente pa amplia riba e parti di financiamento di estudio y posibilidadnan di beca di estudio.  

Manera a wordo anuncia durante e ultimo añanan Minister Michelle Hooyboer-Winklaar, na nomber di gobierno di Aruba, a logra formalisa diferente acuerdo na Merca y Canada cu ta garantisa areglonan special na beneficio di nos studiantenan di Aruba. E areglonan aki ta encera entre otro “in-state tuition”, “out-of-state tuition waver” y tambe descuentonan considerabel riba e suma di gastonan di estudio pa tur studiante Arubiano. E areglonan aki ta un beneficio hopi grandi pa nos studiantenan y ta haci Merca y Canada opcionnan mas accesibel y atractivo pa studiantenan di Aruba. 

Tur studiante cu ta interesa pa bai studia na Merca of Canada ta keda cordialmente invita pa e anochi di informacion. Durante di e anochi di informacion lo duna tur e informacion relevante cu studiantenan tin mester pa por bai studia na Merca of Canada y tambe lo tin espacio pa pregunta. E anochi di informacion lo tuma luga diamars dia 25 di october cuminsando pa 7:00 or di anochi na e Auditorium di EPI.