Un di sospechosonan deteni caso Wayaca ta esun cu a los e tironan

ORANJESTAD - Relaciona cu e investigacion di e atraco riba diamars 13 di september den un cas na Wayaca, lo siguiente. E investigacion ta wordo hiba pa un ekipo special di recherche, cu ta bou guia di un fiscal. E equipo di TGO aki (Team Grootschalig Onderzoek) ta keto bay trahando riba forsa maximo. Husticia a hasta laga trece un experto for di exterior pa haci investigacion tecnico riba telefonnan. 

SOSPECHOSO CU A LOS TIRO

Ta existi indicacionnan fuerte cu un di e dos sospechosonan cu a wordo deteni, ta esun cu a los e tironan. Tambe tin indicaciónnan cu e persona cu a tira, no a actua su so. P'esey cu tanten, e otro sospechoso ta wordo investiga pa complicidad. 

DETENCION

E investigacion a hiba alaves na detencion di un bendedor di arma di candela. No ta existi te awor ningun indicacion cu e sospechoso aki lo ta envolvi den e plannan pa e atraco.

Huez-comisario a dicidi tocante detencion di tur tres sospechoso.

CURSO DI INVESTIGACION

E investigacion no ta cla ainda. E equipo ta bezig cu scucha varios testigo, en especial pa haya mas claridad tocante e motibo di e atraco. Ta trata di un caso hopi serio, den cual a cay un morto y un herido.

OM Y KPA SATISFECHO

Ministerio Publico y Cuerpo Policial di Aruba ta hopi satisfecho cu e cooperacion, cu te awor a hiba na resultadonan rapido y bon.