Surnam ta prohibi Insel Air Aruba bula directo di Aruba pa Surnam

ORANJESTAD /PARAMARIBO – No obstante e hecho cu gobierno di Surnam a prohibi avion di Insel Air Aruba di bula director di Aruba pa Surnam, nan lo purba esaki atrobe diabierna awor. Insel Air Aruba no ta sucumbi pa presion di gobierno di Surnam segun e CEO di e compania, Frederick Nuboer a sigura NoticiaCla.com diamars den un reaccion for di Surnam. Dialuna durante e buelo inaugural di Aruba pa Surnam, nan a haya nan mes cu un sorpresa desagradabel ora cu a tende cu gobierno di Surnam no ta permiti e avion bula directo for di Aruba.

E consecuencia cu e ‘sorpresa’ aki a causa pa e compania ta grandi ya cu p.e. e pasaheronan riba e buelo di regreso cu mester a sigui nan biahe pa Miami, a confronta un retraso serio. Y pa completa e obra, e buelo di diamars anochi pa Venezuela ta no por ni sigui segun Nuboer. Pues e efecto di loke a sosode cu e buelo di Surnam ta grandi.

Nuboer sinembargo ta mustra cu no ta bay stop e buelonan aki. “Diabierna nos ta bay sigui bula y purba bula directo pa Surnam” e la splica NoticiaCla.com. Segun Nuboer, no por ta asina cu Surinam Airways si por disfruta di e asina yama ‘quinta libertad’ y Aruba no. Quinta libertad ta nifica cu un avion por bula pa un destinacion via un otro, buscando mas pasahero y continua pa un di tres destinacion. P.e. Un avion ta bula di Aruba, sigui pa Corsou, recohe pasahero y continua pa Surnam. Esey tabata loke cu e compania a haci finalmente.

Despues di basta intermediacion, Insel Air Aruba a biaha pa Corsou, den un intento pa bula segun e asina yama ‘quinta libertad’. Pero na Corsou a confronta otro problema pasobra pa e ora ey, e tripulacion a bira ‘illegal’. E tripulacion a surpasa su 10 ora di trabou cu ta pone cu nan no ta permiti pa bula e ora mas. Como tal mester a duna e tripulacion un descanso pa cual nan por a sigui mucho mas laat.E consecuencia di esey ta cu diamars mainta ora cu e avion mester a bolbe, e la sufri un retraso debi na e problema di tripulacion, cu a pone cu e compania ta haye awor cu e problemanan ya menciona.

KICO TA QUINTA LIBERTAD: Bula di un pais pa otro pais, recohe pasahero eynan y sigui pa un di tres destinacion.